撐住美股等收爐
2016年12月22日
美股真係氣勢如虹，杜指仲差25點就破兩萬關。在美股谷高加上內地債市反彈下，港股中斷四連跌，插咗幾日終於唞一唞氣。
新股順興爆孖展
美股持續上衝，由於聖誕假就快到，呢個月剩下嘅交易日唔多，相信基金經理會力撐指數，捱到年結日，咁就保住股市高收，可以攞花紅散水，所以杜指破
唔破二萬關唔係咁緊要，最緊要唔好大跌，咁就已經上上大吉。
內地方面，債市大案國海證券被人偽造印章交易事件，市場怕相關100億交易無人認數，但昨早傳出國海願意承認相關交易責任的消息，內地債市暫時避過咗骨牌效應，令債價反彈，A股都隨之彈埋一份。
在美股市造好下，恒指高開後變動不大，收報21809，升80點；國企指數收報9331，升48點。臨近聖誕節長假期，成交額跌到去476億元，為5個半月以來最低。
反而呢排個市興炒新股，香港機電工程服務商順興集團(1637) 淡市下截孖展，反應相當熱鬧，七間券商合共為其借出近60.44億元孖展額，以公開發售集資1250萬元計，超額認購逾482倍。散戶見大股難炒，就買細價新股博炒一轉。
由於一年就快過去，大行開始為全年股市表現計數，其中一個數據係，今年每日平均成交額只有670億元，與對上一年2014年690億元相若，但遠遜2015年的1050億元，由此估計今年港交所盈利唔係咁靚仔。
據美銀美林發表的研究報告，港交所(388) 股價自深港通通車以來累跌咗10%，跑輸大市6.4%。深港通開通後，計及滬港通，南向成交額只佔大市全日成交的3.2%。目前港交所的股價以12個月預測市盈率高達35倍，這種高市盈率可持續性低。
去年同今年，港交所分別炒作滬港通同深港通，美銀美林就估計，明年呢隻股無乜新主題，明年未見有主要的利好因素支持盈利增長，如果推出「債券通」，或可視作正面因素，但根據滬港通及深港通經驗，相信須待至少一年後才會推出；加上人民銀行為銀行間債券市場的監管機構，並於2016年2月開始開放予海外投資者參與，故或令「債券通」計劃只將集中在中證監監管下的企業債。另外，「商品通」似乎亦會於2017年推出，但影響相對較小。
大行唱淡港交所成交減
如果無乜新概念，美銀美林估計投資者將關心成交額的轉變，佢預期明年港股的平均日成交額為740億元，按年升10%，惟即使上升，相信港交所應以較低市盈率交投，維持其「跑輸大市」評級，目標價166元(現價182.1元)。
大行呢排偏向唱淡港交所，雖然O依家話佢來年無乜概念，但我認為呢樣嘢唔需要太過注重。股市從來都係炒起上嚟唔需要藉口，炒得上自然就會搵到藉口。好似今年有深港通，但唔見得呢個概念好有力。可見將來無咗「乜乜通」，但如果大市旺起上來，一樣搵到藉口，好似估吓內地A股指數幾時入摩，都可以炒作一番。
我覺得最實際係股價貴唔貴，如果股價貴，咁就梗係靠概念去支持炒作力度啦，如果股價唔貴，咁揸咗貨最多咪等吓囉。港交所昨日收報182.1元，市盈率27倍，派息3.27厘，未來盈利可能會倒退，派息增長空間有限，現價唔可以叫做平，不過，佢由於係獨市生意，加上內地資金鍾意佢，所以一直都享有比其他藍籌貴嘅估值，所以無貨在手者想買，可以等佢再平啲先，但如果已經有貨，亦唔使俾大行嚇得太驚，一年上上落落，跌完都可以上返去。
陸羽仁
金融High Tea 舊文
來源 source: http://hdfin.stheadline.com