操盤手劄記：
亂市執死雞揀創維
■創維採取Skyworth+Metz雙品牌戰略，成功打入歐洲等地。 資料圖片
新任財政司司長陳茂波發表預算案，喺2016/17年度港府盈餘高達928億元下，派糖比舊年少近一成。呢份預算案建議嘅新措施合共763億元，上月特首梁振英份施政報告建議嘅新措
施亦高達853億元，顯然預算案要考慮替施政報告埋單！
美股連升8日，繼續破頂，懶理加息風險正在上升。港股承接外圍升勢，加上內地A股連升3日，恒指無視技術性超買，升238點或1%，收24201，短線重要阻力位係舊年9月9日高位24364。
特朗普牛市仲可以玩幾耐？Bear in mind，佢係全球危機之源！佢近排煩緊內部事務，對外政策有所調整，令亞洲股市受惠。不過，佢將生意交畀兩個仔打理，而家族一向有炒股，變成掌握內情嘅大莊家！另一方面，英國下月啟動脫歐，本港特首選舉在即，喺內外政治因素下，我對後市有戒心。港股雙頂風險仍在，與其高追，不如執死雞，睇嚇有冇被低估嘅股票。我留意到創維數碼（751）上周二披露遭行政總裁場外減持，上周三股價急插後，退至50天線有唔錯嘅承接。
麥格理更出報告指管理層減持無大影響，並維持「跑贏大市」評級，目標價7.54元。中金兩周前喺創維公佈1月總銷量按年減少16%後，亦出報告唱好，維持「買入」評級，目標價6.14元。該股現價5.1元，預測市盈率6.5倍，預測股息率5.1厘，係唔錯嘅收息股。
創維上月去貨減少，皆因今年農曆新年比舊年提前11日，1月就過年。競爭對手TCL多媒體（1070）上月內地銷量亦減少22%。創維嘅前景在於其出口，1月海外市場增長56%。集團兩年前收購德國Metz後，採取Skyworth+Metz嘅雙品牌戰略，成功打入歐洲、東南亞、非洲、拉丁美洲等市場。4K電視喺歐洲仍然係新事物，今年對歐洲出口可望大幅增長。內地市場4K電視亦方興未艾，1月銷量仍增長12%。事實上，OLED4K智能電視係毛利率最高嘅電視產品，喺中外電視換機潮持續，創維業績有支持。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com