內房國企民企競爭輝
2017年02月23日
美股係總統日後再升過，帶挈港股唞完再上升番突，係滙控腳軟下，中字股繼續領軍，內銀內房雙雙發威。
內房股係農曆年後持續強勢，陸羽仁呢幾個月經常叫人低吸吓內房股，皆因係中央去庫存政策下，內房去年賣樓大豐收，今年業績應該靚仔，而家佢地紛紛發力
炒上，相信係開始反映利好因素。至於今年前景點睇，陸羽仁啱啱同一間龍頭內房商嘅高管食飯，佢話今年中央收緊番樓市嘅措施，但經過呢兩年嘅又緊又鬆，消費者都慢慢適應，佢估計今年整體市道都OK，唔快唔慢，退貨冇問題。
碧桂園進駐三甲股價爆升
高管話，雖然大圍條數差唔多，但係幾大龍頭地產商訂嘅賣樓目標就一啲都唔低，去年恒大(3333) 係萬科(1036) 陷入股權爭奪戰時，過左萬科頭，成為賣樓一哥，全年賣樓3700年億元，另一位三甲份子碧桂園(2007) 打入三千億俱樂部，但憑住係大賣海外樓盤，賣樓衝破3000億元，一舉踢走其他老大哥。
聽聞碧桂園今年仲想挑戰一哥地位，訂下賣樓接近6000億人民幣的驚人目標目標，若然佢訂下咁勇嘅目標，做唔做得到就唔知，不過股價係炒憧憬，可能因為咁呢幾日就係咁爆上。
內房商分為兩大類，一類係國企，一類係民企。前兩年賣樓最多係國企好似萬科、中國海外(688) ，呢兩年就俾民企殺上過頭。不過，分析業務唔止重量，仲要重質，高管坦言好似中國海外呢兩年賣樓量少啲，但佢嘅盤地點好、利潤厚，所以賺頭好得多，好似舊年上半年，佢賣樓唔夠800億元，但就賺左196.9億元，同比增幅 20.6%， 每股基本盈利 1.9964港元。過佢頭嘅碧桂園同期賣左600 億元樓，賺左只係 62.6億元人民幣，同比增幅 22.8%，可見兩者邊際利潤差距幾大。
邊際利潤率高嘅生意防範風險嘅能力好啲，即係盈利質素好啲，呢類股份上落慢啲，但勝在穩陣；好似碧桂園以量取勝，好市時贏得多，炒起嚟勁度大啲，但升得急當然防守性就無咁強嘞。
內房內銀股成為昨日反彈主力，碧桂園再創一年高位，收報5.62元，爆升近5%，中國海外都唔奀，升左3.6%，收24.45元。內銀工行(1398) 升2.2%，報5.18元；中行(3988) 升1.8%，報4.02元；建行(939) 升2.4%，報6.45元。
中字股輪流炒下，市場借意憧憬內地航運業復甦，航運股造好，太平洋航運(2343) 大漲10.7%，報1.76元；中遠海控(1919) 亦走高10%，報3.93元；中外運航運(368) 股價及相關新聞漲6.5%，報1.97元，另外鋼鐵股見鑊氣。個市輪流炒，而且甚有追吓落後股嘅味道。
國企指數再上高位
喺內銀內房帶動下，大市再度出現國指跑贏恒指，恒指收報24201，升238點或0.99%，創一年半收市新高；國企指數收報10537，上揚129點或1.24%，成交就上唔番1000億元，收報925億元。
陸羽仁
金融High Tea 舊文
來源 source: http://hdfin.stheadline.com