Money Walker：
中資股起動有理
■人行幣策早前由寬鬆轉向中性。 資料圖片
人行幣策早前由寬鬆轉向中性，筆者曾經擔心會不利經濟，但暫時似乎未有明顯負面影響。
除咗傳統經濟數據外，LME期銅同Liv-ex紅酒100指數呢兩項內地經濟另類指標，亦印證內地製造業
、建造業同消費齊齊好轉。前者自去年10月起反覆上升，後者更早於2015年尾已見底。
內地經濟暫時未有如筆者所預期般受累幣策轉向，其一可能係由於人行去槓桿未夠全面，信託貸款同票據等表外融資上月增速加快，成為去槓桿下嘅漏網之魚。另人行透過逆回購與中期借貸便利（MLF）等工具調控流動性，相信亦有助更多流動性由投機炒賣活動引導至實體經濟，對經濟多少有幫助。
內地復蘇力度雖然唔見得十分強勁，但就明顯冇市場之前睇得咁悲觀，更重要嘅係最有可能觸發危機嘅人民幣滙價近期已見回穩。倘人民幣冇大鬱動，筆者相信即使欠缺北水支持，本港上市中資股上半年仍有起動潛力。
環顧本港一眾中資股板塊，唔少都已炒起，但內地消費相關股似乎尚有空間追落後，又鑑於唔少資源價格都已炒高，業務不涉及生產嘅零售股，盈利相對較不受國際原材料漲價直接影響，可睇高一線。
不過要小心嘅係，內地復蘇之路仍會比較震盪，一來因為內地上月表外融資增速加快，意味人行有可能再出招收緊流動性，所以暫時仍未能確定幣策轉向對內地經濟零影響。另外亦要留意美國上半年好大可能再加息一次，美元不排除會再現新一波短期升浪，繼而有可能觸發人民幣貶值憂慮重臨，不利市場氣氛。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com