智取大市：跌市的另類觀察
■港股跌穿24000，加上一大堆不明朗因素，現在應撤退還是擁抱風險？ 資料圖片
恒指打穿24,000點之餘，今年升市以來，首次明顯跌穿保歷加通道下軸，兼且通道擴大，傳統技術分析話畀你聽有可能free fall。消息方面，北韓話Keep住測試導彈、特朗普放炮彈
、英國提前大選、法國總統大選逼近、傳中央打擊溫州炒股幫……咁多不明朗因素，講到風聲鶴淚，無論炒圖、炒消息、未食糊，唔全身逃脫都應該減持避險，但原來沽到嚟，執筆時夜期仲有23,800點，距離高位回調唔夠1,000點，確實算硬淨。
資源股可以話近期較差板塊，早喺兩三個月前見頂；中移（941）仲衰，要返去低位；內銀股亦慢慢跌。同期內房股升到爆錶，騰訊（700）仲喺高位附近。更驚喜嘅，加息驚咗幾個月，本地地產股係強唔係弱。睇嚟近兩個月恒指喺高位整固而跌幅不大，資金只係換馬而非撤退。壞消息出咗唔少，但係資金遲遲未撤退，市底已經算唔錯。今個星期正好嚟個測試，越硬淨、越值得興奮。
第二季係股市淡季，每年第二季都總有chok嘅時候、總有驚嘅時間，呢一刻，係撤退？定係要擁抱風險，每次驚嘅時候撈嚇貨？照牌面睇嚟，趁大家驚嘅時候去撈，下半年勝算似乎唔低，當然，首先要你仲有資金。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com