收市閒情：電視業今非昔比
■電視業近十年收入冇增長，但竟然仍有商家想接貨搞電視，難免惹人揣測。 資料圖片
收工，開電視，喂！乜《愛回家》唔係一早做完咩！你問阿媽，阿媽答你，「好似唔係同一套。」然後你嘗試睇落去，松松姐姐扮「沒女」扮得好似好努力！唔係噃，有人WhatsApp，應咗先
！反正TVB嗰啲係廣播劇，唔睇畫面都明；再睇？唔係噃，蘋果動有條片好好笑，CapTV都好好笑，TVB？算啦，啲劇都唔使追，我都係去睇返Netflix算。
TVB係呀，一台獨大呀，咁又點？連令大家坐定定喺電視機面前嘅誘因都冇，好唔好彩哋，「大家」呢兩個字係包埋廣告客本身。大佬呀，連落廣告嗰個都唔睇電視，咁電視台憑咩說人落廣告？當然，均真啲，唔止TVB，其他台條數都唔掂。
四間電視台，即係TVB、NowTV，全年業績盈利倒退都算執到，Cable（1097）蝕嘅銀碼呢？簡直係Double足三兩，電視業務EBITDA由15年蝕4,578萬，到上年蝕1.4億銀。至於ViuTV，上年4月開台係威係勢，製作節目都有新意有心機，但截至12月底Run咗9個月，EBITDA都係蝕1.8億元。睇賺蝕都唔夠恐怖，睇埋收入。2016年全年，TVB收入計係最高，有42億銀；將四間電視台收入加埋，就係83億。83億錢係一個咩概念？就係電視生意一潭死水嘅概念。
我哋時光倒流2007年，當年TVB收入係講緊43億，仲多過2016年。唔好以為2007年啲電視高質好多，當年最勁嗰套只係《溏心風暴》，深夜都係重播《妙手仁心》。OK，試嚇再加埋Cable同NowTV，2007年三個台收入總共係76億元，呢條數仲未計永恒亞視。單純以「83億」同「76億」兩個數字比較，即係話，九年來電視台收入只係增長一成，如果計埋亞視？咁要召喚獎門人出嚟，「打和！Super！」
即係咁，我唔講樓價咁極端，你落旺角買串魚蛋，價錢都貴過十年前啦。電視業竟然可以喺過近十年收入冇增長，連通脹都跑輸，已經唔止係講緊一間機構做得好唔好嘅問題，而係成個行業萎縮ing。當電視業變咗雞肋，甚至可能搭沉船；同時你又聽到有商家想接貨搞電視，你會覺得呢啲商家係真係有心做呢行？定係另有企圖？
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com