三四線內房追落後
2017年04月07日
美股上日大玩過山車遊戲，杜指開市本來氣勢如虹，大升曾經升近兩百點，納指仲挑戰高位，但隨著聯儲局公佈會議紀錄，反映美國收緊銀根嘅速度同力度可能比預期快，美股即插，杜指跌左41點收市，包括香港在內嘅亞洲區股市都無晒力。
樓市癲到你唔信
經濟
增長步伐強健下，美國收緊銀根嘅步伐有加快跡象，除左話加息速度會提高，聯儲局理事最近頻頻將縮減資產規模嘅時間表攞出嚟講。係伯南克做聯儲局主席嘅時代，聯儲局泵水方法之一就係量寬，入市買入債券資產，等如將錢直接投入市場。而家話要收縮資產負債表，等同係市場抽回資金，所以美股即時由亢奮狀態冷靜下來。
一支臘燭三頭燒
有中環茶友話，呢排港股好受北水影響，反而港人關注樓市多過股市。港島區有大型樓盤推出，一房價格過千萬，實用呎價去到接近四萬元一呎，呢個價錢係兩、三年前諗都無諗過。內房商來港投地出超高價，本地發展商形容為「癲價」。從用家角度，港島區大型屋苑格局物業賣四萬元一呎，何嘗不是癲價？
要留意嘅係，係樓市癲價時代，美國利息上調步伐加快、聯儲局講緊幾時開始啟動抽水機，透過縮減資產負責規模將資金泵番走，加番樓價上升加重供機負擔，好似一枝蠟燭唔止兩頭燒，仲要係中間加多把火變成三面燒，真係唔知頂到幾耐，所以雖然一、二手樓價錢係咁飊，但地產股價就不動如山。
美股回調，港股本來炒緊內地雄安新區概念，都要飲吓涼茶抖抖。內地就續受「雄安新區規劃」的刺激，軌道交通板塊大幅上升，上證綜合指數收市報3281點，升10點，升幅0.33%，連續3日上升，仲創四個多月新高。港股就無A股咁叻，恒指收報24273，跌127點；國企指數收報10276，下滑88點，成交金額809億元。中美領導人即將會面，市場相信也無風雨也無晴，投資者反應唔大，雄安新區概念股就出現回吐，金隅(2009) 跌7%，報4.46元；中國宏泰(6166) 走低6%，報3.5元。
三四線內房玩尋寶
大市高位徘徊，資金繼續炒落後尋寶。內地公佈3月份賣樓數字仍然火紅，內房股周四逆市造好，三大龍頭之一嘅恒大(3333) 升3.7%，冷門股新嶺域(542) 大升25%，報0.168元；融創中國(1918) 9%，報11.62元。
本身實力唔錯嘅綠地香港(337) 股價上升15%，報2.65元，創九個月新高，但仍比一年高位3.5元有尚有差距。綠地上周公佈業績，去年純利11.1億，大升406%，價市盈率6.1倍，派0.1元末期息，息率都有3.8厘，所以追落後炒吓唔出奇。大華繼顯表示，內房3月銷售額超預期，部份更創下單月新高，成為板塊向上的催化劑。內房銷售超預期主要是開發商推貨量加大，非核心城市銷售強勁部份，抵銷核心城市成交量的下降，預計全年房地產銷售可保持平穩，由於好多三、四線內房股估值仲係低，故此資金一追就爆升。
陸羽仁
金融High Tea 舊文
來源 source: http://hdfin.stheadline.com