財經評論：
買樓受難五部曲
■今日瘋狂樓市下，買樓與受難沒有分別。 資料圖片
今日瘋狂樓市下，買樓與受難沒有分別。結合近期樓市不同瘋癲元素，可簡單歸納出市民買樓受難的五種常見現象。
第一部曲：買新樓做佈景板。地產商為營造樓市火熱場面，每次唧牙膏逐批單位小量發售，買家去售樓處排隊，一早起身慘過返工
，但排幾個鐘都未必揀到樓，他們卻成為售樓處人山人海的免費人肉佈景板，幫發展商做宣傳。
第二部曲：二手盤冇得揀層數。二手盤源非常短缺，買樓不同以前有得揀，首先冇得畀你揀邊座，高中低層、望咩景都冇得揀，只能因應當時供應情況。以前創新高成交一定是高層優質單位，但現時只要有盤出現，就算是低層無景或同層有凶宅，一樣奇貨可居。
第三部曲：買樓只能睇外牆。交吉盤買少見少，大部份放盤不是連租約，就是「租中交吉」，意思是單位現有租客居住，買家不能睇樓。這類單位買家多只能睇平面圖或落街望上去間屋幅外牆就算。
第四部曲：仔女上車父母受難。現時樓價之高，並不是一般市民所能承擔，就算供得起都畀不起首期。近期樓市出現一個現象，就是買家帶埋畀錢的父母一齊睇樓。沙田第一城細戶史上首宗「5球」成交，買家為首置上車客，當日也是在父母見證下以509萬元易手。
第五部曲：居屋都買不起。私樓市場價格急升，居屋及公屋樓價不可能不升，尤其是未補地價的居屋第二市場，成交價更為驚人。其中深水埗居屋樂年花園綠表成交價高達730萬元，貴絕全港未補價居屋。樓市瘋狂，公屋富戶也不惜交還手持公屋作為換取綠表上車資格，擔心今日不買，將來追不上樓價升幅。
記者：朱連峰
財經評論 舊文
來源 source: http://hk.apple.nextmedia.com