財路：買定百仕達等收成
■百仕達揸住「洛克外灘源」項目，屬超級靚仔地段。 資料圖片
內房啱對上一季，逐隻鬱兼輪流創半年或者一年新高，百仕達（1168）橫行成年，係未升過，淨現金幾乎睇齊總市值，加埋揸住兩個超靚仔項目嘅肥仔增值，有得諗。
百仕達現價0.84元，潛喺近三年底，一年嚟係無累進升幅
。睇番行家，主打上海內房嘅湯臣（258）一年累升83%、二、三線內房莊士中國（298）同期累升66%、香港建設（190）升56%，花樣年（1777）24%，百仕達超落後。
百仕達股價橫行唔鬱，同集團過去幾年再無新project推、欠奉內房銷售收益有關。但咁睇，百仕達家陣揸住「洛克‧外灘源」同「寧國府邸」，兩個項目分別位處上海外灘同長寧區豪宅區，係超級靚仔地段。
又按規劃，前邊洛克外灘源合營綜合發展項目，總建築面積101萬平方呎，明年完工兼全面開業。後邊寧國府邸樓面10.6萬平方呎，百仕達應佔80%，綜合2015年同2016年年報講，項目應該喺上年下半年完成，家陣兼規劃銷售方案。睇到係，尤其寧國府邸，已經ready，加埋靚仔地段，嚟緊日子，係睇勁厚收成同增值。
百仕達到上年尾NAV1.8元，現價0.47倍PB，連物業潛在增值計，PB隨時低過0.4倍。百仕達到上年尾淨現金29億元，而隨住寧國府邸有進一步銷售入賬，百仕達有現金流入，淨現金水平應該仲高。
百仕達家陣市值都係得30億元，即係話，現價買百仕達，只係反映緊每股淨現金水平，包括上邊兩個靚仔項目，係免本持有！百仕達超級現金牛，就算再橫風橫雨，都冇有好怕。
買股買前景，趁價殘，收百仕達，等靚仔項目收成，當現價翻半番到1.3元計，連重秤後NAV計，PB分分鐘只係喺0.6倍水位，仲係好安全。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com