魚樂無窮：科網股撈唔撈？
■騰訊最近被北水狂沽，若因此而睇淡，未免太過武斷。 資料圖片
科網股是否見頂，再度成為市場熱話，遭沽空風暴正面吹襲嘅股份如瑞聲（2018）及科通芯城（400），圖表明顯走樣，尤以後者為甚。部份則因股東減持令走勢逆轉，當中包括通達（698）、昂納科技（877）
、ASM太平洋（522）。說穿了，最強一定係騰訊（700），然後搭多隻舜宇光學（2382），科網股係咪見頂一定係問呢兩隻。
估值貴定平我唔識睇，但兩隻股份行咗幾年大浪，升幅數以百倍計，如今由高位回調唔夠一成，現時搬出見頂論絕對講唔通。「但呢排在香港呼風喚雨嘅北水，沽騰訊沽得好勁喎，驚唔驚先？」
今次佢哋啱唔啱，要事後孔明先知，但根據過往經驗，強勢股絕對經得起北水考驗。滙控（005）就係一個好例子，年初因暫停回購，北水轉買為沽，股價一度跌至近60元大關，但最新季度業績交足功課，反過來挑戰70元水平。
所以因為騰訊被北水狂沽而睇淡，未免太過武斷。至於係咪撈得過，就好視乎你信唔信科網股的故事，你信嘅，幾十倍PE可以係好平，唔信嘅，盈利增長五成或者更多都係泡沫。
唐牛
https://www.facebook.com/tongcow88
本欄逢周二、四刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
唐牛
魚樂無窮 - 唐牛 舊文
來源 source: http://hk.apple.nextmedia.com