【實力取勝】肯捱就有錢收（陳承龍）（第129期）
2017-6-15 17:30:51
小弟死硬睇好個市係有回報！星期一大市跌322點，全線大價股連同騰訊（00700.HK）都跌到一仆一碌，小弟喺網站聲音專欄《12點半陳承龍》話大股我同佢死過，夠膽就加貨，第二日大市即刻返彈，濠
賭股重越升越有，都咪話唔勁。
講真，個市由年初升到依家，每次話跌都跌唔落，反而北水係咁湧落香港買股，證明真金白銀睇好港股。依家已經唔可以用以前嗰套炒上落去睇港股，因為大陸人對平貴嘅概念同我哋理解完全唔同，你諗嚇，九龍城廣場，除咗停車場會有車排嚇隊之外，原則上係一個死場，內地超市就諗住用50億港元買起佢。一個死場，內地富豪都會用咁多錢買，香港咁多股票仲係平，有增長概念，全部正當仲要壟斷生意，北水掃起港股就好似買玩具咁，個市邊度跌得落。
好似小弟其中一隻重中之重嘅濠賭股新濠（00200.HK），6月頭短期穿過20蚊，星期二即彈5%，睇返CCASS，6月份新濠調整嘅時候，北水係咁買，合共淨增持487.4萬股，差唔多成億錢買落嚟，你一跌佢就吸，肯定仲有後著。早排CNBC終於執我哋《策略王》口水尾，話濠賭業見咗底，其實我哋舊年一早已經咁講，不過西方傳媒咁樣講一講，外資基金如果都加入買埋一份，幾隻賭股我真係唔知點樣估頂。
股王騰訊就更加唔使講，之前強勢升穿280蚊後，稍為唞一唞，但肯定故事仲未完，依家中國做乜生意都同騰訊有關，佢本身遊戲業務亦都已經全球化，唞夠肯等肯定有得再升，冇理由高盛美國嗰度唱一唱報告就可以吹散科技股，科技股大浪肯定未完。
加埋市場賭緊A股今年入摩指，A股谷底都反彈，而且港股升，中資股都升，冇理由唔會帶動埋A股，兩隻ETF 2822同2823真係要揸實，大陸嘅暴力式炒法唔係人咁品，一旦走咗，佢可能開車就錯失咗暴力炒上嗰一刻，如果真係有機會回，真係唔溝佢都偷笑。
短期個市的確可能有啲震盪，但係港股今年個市底強成咁，走咗真係買唔返，你聽我講，今轉肯捱就等收錢，起勢同個市死過！
實力取勝 - 陳承龍 舊文
來源 source: http://www.winmoney.hk