【不問價追】大升前的神龍擺尾（小炒王梁心欣）（第132期）
2017-7-6 19:30:09
上回提到，七月份小炒王希望見到一個健康嘅調整，即係話，七月份我睇係會向下。剛過去的星期二，因為騰訊（00700.HK）嘅調整、北韓洲際導彈試射成功、資金鏈斷裂令細價股爆破等因素，
恆指一度大跌500點。呢個調整好多人都想撈底，但小炒王忠告大家「小心為上」。因為2017年將會係大升大跌之年，最後谷上去28,000樓上嗰度力，一定要儲夠氣先至行，所以大市連升六個月之後，遇上七月嘅調整係正常不過。
早於六月下旬已經叫各位投資者留定現金傍身，目的就係等調整之時進攻。咁你會問，今年個頂見咗未啊？大市會調整到邊度呀？我會答：「26,000點非今年頂位」、「大市將會由高位調整1000點樓上，上半年高位係26,090點，即係話要見24,000點水平」。
點解我會話大升前會出現神龍擺尾？原因係以往好難見到一條氣大升幾千點至一萬點嘅大趨勢，加上沿途上到嚟26,000點水平，你有冇覺得自己冇賺到啲咩大錢呢？除非你買咗騰訊、吉利（00175.HK）等大升股份，否則你荷包仍然都係空蕩蕩，以大戶的習慣推算，係推高指數之前，一定會將你啲貨吸乾吸淨先至大大力再谷上去，到時逼到你見高要追，見低又唔敢出來沽。
呢招神龍擺尾過去多次升市入面都有出現，所以希望今次冇估錯，七月份來一個合理嘅調整，重新洗洗牌，到時揸返一啲紮實嘅股份伴隨升浪坐上去。
我認為合適嘅持股比例，應該係三七對分，持三成嘅貨，七成嘅現金，不做任何孖展，如果你更加進取嘅話可以做埋對沖，開put都得！用一個細的注碼做定對沖亦不是壞事。
想放假就七月份出外走走，七月下旬再部署今年最後一升，咁先係上策。下半年要關注嘅加息、縮表、內地十九大等要素，還是過多一星期先深入分析吧，最後再提一提，「現金為王」，10年難得一遇嘅大升大跌浪，記住要好好把握。
不問價追 - 小炒王梁心欣 舊文
來源 source: http://www.winmoney.hk