異動空間：半新股王何處尋
■藥明生物6月中掛牌以來拾級而上。圖為藥明主席李革（左）及首席報行官陳智勝。 資料圖片
恒指25500附近爭持，未知爆上爆落，牌面睇係弱居多。不過，大行近排吹親雞都有反應，周四輪到摩笛吹起長汽（2333）及廣汽（2238），加上北水7月以來流量急增，反映資金泛
濫又未見危機之下，資金都好樂於搵股炒，本月有機形成「市悶股旺」的情況。
魏力昨於直播節目分析，美圖（1357）月初大手轉倉後股價轉強，事緣保薦人之一大摩大手減持3.83億股，德銀亦跟掟17球，加埋成4億股，由中資背景的鴻鵬資本接曬，外資退、中資進，是否意味限售股拋售潮近尾聲，進入新一輪升浪？不妨再觀察。
大型半新股藥明生物（2269），6月掛牌以來拾級而上，昨漲6%，創上市新高32.1元，無蟹貨一望無際，中型股又當旺，隨時好似3月時美圖一樣升到你唔信！何解？三個原因：貨源歸邊、大行垂青、股東星光熠熠。
股權披露顯示，僅21%藥明股份存放於CCASS，當中首十家券商已佔91%，集中度不斷提高，街貨之少可想而知。上市以來，渣打、摩通、滙豐等投行大手增持，不排除為日後出報告唱好作準備。股東猛人眾多，包括博裕資本、雲鋒資本、淡馬錫等，看好業務前景不言而喻。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com