炒股仔貪新忘舊
2017年07月07日
美股前晚牛皮，納指就稍為反彈。不過，中環茶友就留意到，大行呢排對科技股唔係咁友善，繼科網股後，電能車股Tesla亦成為唱淡對象。
高盛發表報告，Tesla新車交付量未如理想，加上銷售增長將放緩，故將六個月目標價由190美元下調至180美元(現
價是327.09美元)。高盛之前已經唔係咁睇好該公司，目標一早已經低過佢嘅市價好多。今次佢質疑集團嘅出車量之餘，仲話埋富豪集團(Volvo)計劃提升電動車生產比例，會令Tesla所面對的競爭加劇。係大行唱淡下，Tesla股價收報327.09美元，跌左7.3%。
大行呢排成日針住科技股，中環茶友拉闊啲嚟睇，認為同佢地分析未來資金流向有關。九月份美國有可能啟動縮表，變相減少投放係市場嘅資金規模，咁會令資金供應減少，後果可能係令資金成本上升。資金有價，咁就對低盈利同少派息嘅科技股不利。
騰訊反彈暫仍乏力
二千年科網股泡沫形成，好大原因係美國聯儲局擔心千年蟲會出事，打擊美國經濟，當時嘅聯儲局主席格林斯潘係新世紀來臨時大力放鬆銀根，防範實體經濟出現風險，係資金氾濫下以概念取勝嘅科網股被瘋狂追捧，當時好多網上銀行股身價直迫美國最大銀行的市值。事後發覺千年蟲係科技界吹出嚟博人換電腦同更新軟件嘅疑似危機，於是聯儲局開始收緊銀根，終於觸發左科技股泡沫破裂，納指暴跌近七成，如果未來美國資金供應減少，科技股會唔會出現新一輪汰弱留強呢？
美國科技股好似企係十字街頭，香港掛牌嘅科網股王騰訊(700) 經過周三股價坐過山車後，多家大行發報告力撐，當中德銀預期第二季來自《王者榮耀》收入可升近五成至141億元，仲上調騰訊目標價至320元，帶動騰訊股價由低位260元回升，不過在周三升完一日之後，內地《人民網》第三度批評《王者榮耀》，指即使一款手機遊戲成為全民遊戲，都要兼顧不同群體需求及特點，因小童容易沉迷遊戲，是關乎生命健康、公共利益以及社會責任，並倡導健康娛樂。睇番昨日騰訊反彈後勁乏力，一開市上275元，升左4元，但已是全日高位，之後就從高位回吐，收市只升0.8元，收報271.8元，在早前10天線跌穿50天線後，繼續在50天線274元樓下收市，睇嚟力度都仲係唔係幾夠。
呢排個市陷阱唔少，細價股係上周爆災後，餘震繼續責死唔少人。翠如BB股聯旺(8217) 昨日再插16%報收0.5元。佢由高位累跌98%，對於高位買左嘅股民嚟講，一日跌多0.1元都無已經係去到唔識痛嘅地步，但對想撈貨博反彈嘅跟進者嚟講，咁就差錯腳拗左柴，感覺痛入心脾。若在大跌之初1元去撈，而家唔左一半，入晒肉。但聯旺市值仲有6億元，對一隻創業板股嚟講唔算係好細隻，所以呢啲低位插死人嘅風險真係不可不防。
翠如BB股低位插死人
大市昨日低收，恒指報25465，跌56點；國企指數收報10346，下滑34點，成交780億元。藍籌最叻長城汽車(2333) 急升7.9%，收報10.54元，券商繼續唱好汽車股；另外中國財險(2328) 追落後急漲6.6%，收報14.5元。散戶就追捧新股同半新股。盛業資本(8469) 首日掛牌，全日收報2.23元，較發售價2元上升12%。
多隻半新股炒高。建成控股(1630) 一度升36%，高見0.68元，現漲28%，收報0.61元，較招股價0.38元累積不少。
瑞斯康集團(1679) 後上發力，收升30%，報2.21元。集團招股價1元，上市後最高見2.75元。至於創業板ITP(8446) 曾升20.8%，見2.38元創上市新高，收升12%，報2.2元。股仔一雞死、一雞鳴，通常係只見新人笑，不見舊人愁。
陸羽仁
金融High Tea 舊文
來源 source: http://hdfin.stheadline.com