魚樂無窮：強勢股無謂估頂
■平保挾著金融科技股概念跑出，相信可以走得更遠。 資料圖片
夏天，為大地帶來雨水，天鴿，為香港帶來假期。噚日大家仲估緊八號風球捱唔捱到中午，結果換來數個小時的十號風球，如果當上市公司業績睇，呢份成績表絕對係超預期。不過，呢個假期對唔少人來說，代價相當大，吊船
撞豪宅、水浸停車場、球場變泳池都係少事，低窪地區居民身陷險境事大，始終人命攸關嘛，但願大家都平安無事吧。
近日騰訊（700）明顯不在狀態，日前在fb專頁推介嘅平保（2318）挾著金融科技股概念跑出，強勢破頂，在冇蟹貨的情況下，相信可以走得更遠，有跟進嘅戰友繼續坐定定，無謂估頂。
個股方面，可留意薄頁包裝紙製造商優源控股（2268），日前公佈靚仔業績，中期盈利大升65.3%，至2.2億人仔，管理層表示，政府力谷環保，加快淘汰不合規落後產能，對集團絕對有利。旗下37條生產線已幾近飽和，亦期望每年產能有二至四成增長，未來業績表現已有保證。
雖然今次未有派中期息，但管理層講明會盡快復派，連憧憬都有埋，呢鋪清一色齊章了。近日股價回到升浪嘅起步位，以2.35元作止蝕位，有一定值博率。
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com