油股新世代
2017年08月24日
借住美國總統特朗普推動稅制改革嘅消息，美股大升，杜指周二升左196點收市，頗有再挑戰兩萬二千點關口之勢，可惜香港打十號風球，全日停市，錯過左一個可能由外圍帶動嘅升市。
特朗普推動稅制改革，市場人士未食到糖已經開心定先，佢地認為稅改同奧巴馬醫保唔
同，廢除奧巴馬醫保係減派福利，擰走選民嘅芝士，就算共和黨人想支持，都唔敢太出力，相反減稅係畀錢，雖然依家仲未計掂啲錢喺邊度嚟，但斷估都容易過關啩，所以個市就炒左上去先。不過睇長遠少少，特朗普係一個非主流總統，無人想佢成功，唔能夠排除派錢都過唔到。
港股周一大升，唔多唔少有偷步升上去嘅味道；不過，收市後公司派成績表普遍唔錯。本來個市好有機會再下一城，可惜就撞正打風。呢個風本來話凌晨已經會到，但臨入夜佢就放慢腳步，結果差唔多天光至到，早上好多地方仲係無乜嘢，到九點過後先風起雲湧，打得好應，結果個市就停足成日，美股升得咁勁，唔知可唔可以維持升勢。
聯通混改開波溢價配A股
美股向好，港股無得玩，內地股市照開，但A股就無乜受惠，滬深股市一度造好，但收市齊齊微跌，上證指數收報3287點，跌2點，深證成指收報10619點，跌34點。
內地最近開始推動混改，聯通(762) 配合A股公司混改，周二深夜公佈，向母公司聯通BVI(由聯通A股持有)，發行發行66.5億股新股，每股作價13.24元，較昨收市價12.04元，有10%溢價，集資880億元。
聯通為咗股改以溢價發股，反映公司對股價嘅底線。同一時間，股改嘅目嘅係提升效率，改革實施後，將結合公司實際啟動管理人員市場化改革，亦係今次混改嘅系統改革舉措之一，其中包括加大市場化選聘力度，實現現有各層級管理人員5%嘅退出率，激發隊伍活力。
內地電訊公司都係有規模嘅巨無霸，但因為體制所限，回應市場唔夠靈活積極，股改理論上係好消息，所以呢排股價已經開始炒上嚟。
另一單同龍頭國企有關嘅消息，係路透社報道，中石油(857) 美國同加拿大辦公室出現大量員工離職，引發外界猜測該公司喺北美縮減業務，據中石油向路透證實，自舊年以來，該公司喺休斯頓和卡爾加里嘅辦公室已有超過30名員工離職，其中包括原油、金融、天然氣同化學製品貿易業務嘅負責人。消息人士解釋，調整係同北美辦公室之前擴張速度可能過快有關。
中石油瘦身一葉知秋
對於中石油呢次縮減人手，有中環茶友認為唔係個別事件，背後可能同整個油價走向嘅分析有關。過去大陸對於能源安全十分著重，經常研究點樣增加能源儲備，包括喺世界各地收購油價資產，油價下跌被視為增加儲備機會。
但隨住內地大量使用高鐵，加上全球推動電能車趨勢加速，未來對燃油嘅消耗可能減慢，又睇住美國大增天然氣供應，壓住油價打俄羅斯，如果呢個趨勢維持，咁中國就有需要及早調整能源組合，仲係咪需要大力增加石油供應，就係要研究嘅課題。
中石油嘅策略係點，對於中國係好重要嘅戰略，唔會咁容易俾外界知道真實答案。不過依家好多能源專家，都開始評估緊石油長遠前景，因為喺溫室效應下，全球都傾向增加使用燃氣同電力，石化燃料使用將會下降，所以中東國家都好小心咁規劃佢地未來嘅產油計劃，並安排將石油資產上市，同步仲對國家嘅財政同投資加強管控。
從呢個角度嚟講，中石油喺北美瘦身可能係一葉知秋，油價有機會再唔會好似以前咁大漲小回，浪比浪高，油價147美元一桶嘅日子，可能一去不返。雖然石油可見將來仲係最主要嘅能源產品，需求卻可能見左頂，油公司嘅股價可能變成有波幅、無升幅，炒油股只能以低吸為主。
陸羽仁
金融High Tea 舊文
來源 source: http://hdfin.stheadline.com