【實力取勝】 慢牛重生（陳承龍）（第139期）
2017-8-24 18:00:47
未入正題，講講其他嘢。炒股其實好大壓力，而小弟嘅減壓方法都幾健康，就係做gym，呢期操緊手臂（見圖），希望練好啲，同個市拗過手瓜啦。
正題呢，當然講返個市。之前金仔同侵侵口水戰，得個講字， 咁
大家當然唔希望佢哋堅打，但金融市場咁樣震一震，重貨者例如小弟咁都幾傷，但有市未為輸， 呢幾日啲平保（02318.HK）就已經幫我追返一大截。其實呢， 政治因素有咗月頭呢一役，個市場已經免咗疫， 兩個政治人物再出嚟吹水，威力已經大減，萬一真打，估計亦會係速戰速決，係美國解放北韓居多，兩國強弱懸殊，根本冇得打，所以未來金融市場，真係易升難跌。
個市又點睇呢？未來都係慢牛嚟㗎啦，唔會有之前嗰啲波幅， 只會慢慢升，所以大家可以安心坐貨，而方法就係追逐強勢股， 邊隻破頂追邊隻，好似平保好多人覺得貴，但一出半年業績後就破頂，個勢靚到不得了。反觀好多弱股，冇勢就冇勢，揸貨死坐都冇用，少掂為妙。至於早前強勢嘅騰訊（00700.HK）點解跌、轉弱呢？ 小弟同黃國英觀點一樣，就係月底恒指換馬，啲大基金沽定先， 就係咁簡單。
上星期小弟都講過，「大戶擺明睇住嚟食，係要趕散戶或冇實力者落車，尤其星期二尾市最明顯， 好多隻重磅股刻意打落全日平均價之下收，譬如隻建行（00939.HK）， U盤俾佢U低4 格， 騰訊仲離譜，由321. 2蚊U 到落318. 8蚊； 但那邊廂內銀股今早的升勢已言明一切， 有心夾佢上去一啲都唔難，所以唔好畀佢嚇倒， 依家最緊要是保持實力。」
今個星期騰訊日日U盤畀人U 低，就知大戶有心震走啲人。但係指數又不斷向上，明顯呢隻慢牛又行過，總之，大家有耐性肯坐，啲錢就會係咁嚟嘞，邊有得輸吖。
實力取勝 - 陳承龍 舊文
來源 source: http://www.winmoney.hk