生活 - 葉朗程 2017年8月2日
貴到飛雞飯
你吃君悅酒店的海南雞飯，那麼君悅酒店的海南雞飯又吃什麼？你沒看錯，我是問，君悅的海南雞飯，吃什麼？
答案是死貓。
君悅的海南雞飯吃了很多年死貓，卻沒有人為它平反，今天應當還它一個公道。
廣告
未還公道前，想模仿一下坊間某些人對君悅海南雞飯的反應；模仿前要深呼吸，因為他們都說得蠻激動的。
「黐忍線！全港最貴280 蚊一個海南雞飯？憑咩呀？食咗會飛呀？雞冇雞味飯冇飯味湯冇湯味，咁都夠膽死賣 280 蚊？(其實你講少咗五蚊，係 285 蚊) 仲要多五蚊？我喺出面食，五蚊可以加飯底喇！(當然仲未計加一啦) 仲要加一？我喺邊間邊間食個海南雞飯，好食過君悅多多聲，六十蚊有找喇，唔使加一，仲有紙巾送添呀！」
廣告
大佬。
搵支槍指住你去食咩。
入得六星級酒店，咁嘅格局，收你九十九蚊一個飯再加八蚊送杯紅豆冰好冇？係，285蚊一個雞飯未必會好食過 60 蚊一個雞飯，但試問有邊個畀得起 280 蚊食一個雞飯嘅人係會純粹為咗食個雞飯？有啲人就係咁㗎啦，又想食平民嘢，但又想對住五層樓咁高嘅落地玻璃食，咁你咪由得人哋貴夾唔飽囉。
鬧得咁激嘅人，唔係冇 common sense，而係冇 commercial sense。乜嘢叫做冇 commercial sense？當你 single out 一個 quality 去比較兩者嘅價錢，就係冇 commercial sense。即係咁，如果一個雞飯嘅價錢係純粹睇隻雞有冇雞味，咁係咪一張演唱會飛嘅價錢就純粹聽個歌手識唔識唱歌？你夜晚喺 Lobster Bar 聽一位菲籍女士唱歌，肯定好聽過香港很多天王天後，咁你唔好話，走去 Lobster Bar 聽歌咪得囉，做乜要買成千蚊張飛聽鄭秀文啫？
我們要比較，就比 apple to apple，比鄭秀文 to 楊千嬅，比君悅 to 其他六星級酒店的海南雞飯。
這樣的比較才公道，這樣的比較我最耍家。
香港四大六星酒店的海南雞飯真的不相伯仲，要比較誰最好吃，很有難度。硬要選個最好，我會說君悅的飯最香，而且顆顆獨立分明，雞油色澤誘人，乾蔥味幾乎是撲鼻而來；輪到雞飯中不可少看的黑醬油，四間的味道也難分高下，應該都是用廣祥泰這個級數的老字號頂級醬油，平手吧；湯嘛，這個分別比較明顯，嚐得出Four Seasons 那碗淆得最有火候，但就是層次太豐富，很難嚐得出當中的材料，要試多幾次才行；最後，當然就是重中之重的海南雞了，真要四選一的話，只能說是 Ritz Carlton 僅僅贏一個馬鼻，贏就贏在雞皮中帶有一點「田園」味道，可能是在浸的過程中加有西芹或甘筍之類的，呢啲咪叫講究囉。
講到明係四大酒店，點少得半島呢？咁半島又有咩過人之處？未講之前，真係要先還君悅一個公道，成日話佢全城最貴，人哋君悅食咗隻死貓咁耐都唔出聲，其實佢係六星裏面最相宜嗰間。Ritz Carlton 收 $308，Four Seaons賣 $325，本來半島就只係 $280，平君悅五蚊咁大把，不過半島就係有啲小家囉，想食髀肉竟然要加多 60 蚊，其他酒店都唔使加錢，即係喺半島食個海南雞髀飯就要 $340，真真正又肯肯定的全城至貴。
《蘋果日報》下次話邊間邊間全城最貴之前，唔該做嚇 research 喇。
如果聽日就要死，人生只能再食一次海南雞飯，食邊間？唔使問，肯定食 Ritz Carlton。唔係食隻雞，而係食個勢，可以喺 102 樓咁高食個海南雞飯，全世界就只有香港的 Ritz Carlton。
走到入西貢貼住地食有一碟海南雞飯，上到去 102 樓離住地食都有一碟海南雞飯，這樣就是家家有求，沒有對錯之分，文明人都應引以為傲的 capitalism 了。
原刊作者facebook專頁
來源 source: http://thestandnews.com
生活 - 葉朗程 舊文