Money Walker：下半年環球主調：弱美元
■國際金價技術上正蘊釀向上突破，有望重拾大升勢。 資料圖片
美國加息預期再度降溫，參考芝加哥期貨交易所數據，利率期貨市場預期聯儲局未來一年僅加息一至兩次，難怪美元回吐未止。美元走弱對於港人外遊冇乜好處，但本身卻係一個投
資主題，而且似乎漸成下半年環球投資主調。
由於市場上多數大宗商品均以美元計價，而美元走弱將變相支持商品價格走高，所以未來商品相關投資如資源股、澳元及紐元，均值得留意。同樣以美元計價嘅黃金亦可看高一線，國際金價技術上似乎正在蘊釀向上突破，金價橫行數月後有望重拾大升勢。
值得留意嘅係，美國加息預期減低不但拖累美匯，更導致與環球金融股走勢相近嘅美國兩年期債息，未能突破去年底開始形成嘅橫行通道。美國兩年期債息現時仍受制於1.45厘阻力，債息受壓理應不利金融股，不過反映環球金融股表現嘅MSCI環球金融股指數未受影響，自6月底起已突破阻力，相信係受到早前歐美多間大銀行業績不俗所刺激。
支持金融股呢大半年起死回生嘅因素眾多，加息預期與銀行業績只係其二，美國放寬對金融業監管、環球經濟復蘇不俗，以及個別金融公司有意或正在進行回購等，都係支持金融股嘅動力。但由於息差擴闊因素似乎已反映得七七八八，除非加息預期再度翻炒，又或者上述息口以外因素繼續發力，否則要小心市場對整體環球金融股熱情難以維持。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com