甩左包袱精神爽
2017年08月10日
港股衝近兩萬八，心理壓力同累積升幅都有番咁上下，港股昨日開市即回調。午後港元匯價略為轉強，港股跌幅先至收窄番。
港匯近排弱勢，之前出現九連跌，逼近10年低位，雖然外界唔係太關注，但港息低美息高，港匯弱反映套息活動，若情況持續，就有可能需要略
為拉番高息口戥番住個價。本來套息係聯匯機制可以成為觸發點。美國今年接連加息，香港因為錢多一直無動作，照道理息口遲早都要跟番上先至可以留住資金，當港滙跌到弱方保證自然活動，只係如果個市要搵理由調整，咁息口或會向上，市場就會開始留意，作出反應以消化呢個消息。
港匯腳軟要留神
睇番個市昨日一早就調整，咁啱去到下午，港匯指數忽然急升約50點，現報7.8189，升近7.82重要關口，港股跌幅就收窄左，睇嚟大戶都唔係完全漠視本地匯價嘅變動。港匯有變化，市場對金管局有無動作關注度都大左，啱啱增發左400億元外匯基金票據。金管局就解釋，咁做只係為左滿足銀行對相關工具的龐大需求，與港匯走勢無關。佢地仲話，當港元兌美元匯價轉弱至7.85並觸及弱方兌換保證，便會出現資金外流，港元結餘收縮下會引致港元利息上升，呢個係聯繫匯率下嘅合理行為，屬制度設計一部份無需擔心。呢番解畫可能幫手紓緩左市場嘅情緒。
九倉全面撇開有線
港股午市跌少左啲，恒指收報27757，跌97點；國企指數收報10962，下滑117點，成交964億元。騰訊控股(700) 續創新高333元，仍升0.5%，收報330.2元。雖然指數應市場要求唞唞，但藍籌續有神奇股份，今日輪到近年好強勢嘅九倉(004) 大力爆上。九倉今年中期股東應佔盈利84.4億元，按年增25.5%，每股基本盈利2.78元，派中期息0.64元，按年增10.3%。
派成績表後九倉股價午後逆市急升，收報79.65元，大升13%，市值一日急升近300億元，控股公司會德豐(020) 都升逾10%，收報66.4元。
除左講業績，公司披露早前建議分拆收租公司九倉置業投資獨立上市，現仍處於初步階段，申請尚未提交港交所。分拆未搞好，但公司都有禮物派，集團宣佈以實物分派的方式派發晒手頭嘅有線寬頻(1097) 股份。初步計算每持有100股九龍倉股份獲派發48.93564股有線寬頻股份，以有線寬頻股份收市價每股港幣0.35元計，呢批有線寬頻股份的總市值約為5.2億元，相當於分派約每股九龍倉股份0.17元。有中環茶友話，早排撞到九倉主席吳天海，恭喜佢賣甩左有線，佢一聽即刻笑晒口，而家仲連持有嘅股份都唔要，送晒畀小股東O添。聽講賣有線呢攤嘢係太子爺吳宗權提出，認為搞傳媒副業不如集中精神做地產好過，若然係咁，權權決策真係正確。唯一可以改善嘅係佢咁送法，有好多股東收到濕濕碎嘅股份，做鹽唔鹹、做醋唔酸，點解唔賣埋畀買家永昇，分錢俾股東算數呢？
無論如何，出埋呢一招實物分派，九倉手上唔再持有有線股份，連小股東都唔係，將來即使有線蝕到阿媽都唔認得，都唔需要再為呢批股份減值，都係同有線撇清關係嘅一招絕招，由此可見，太子爺權權真係唔太睇好有線啦。
陸羽仁
金融High Tea 舊文
來源 source: http://hdfin.stheadline.com