笑到最後：追落後要走得快
■港股終於被推鬱，要贏錢惟有癲埋一份。
上星期大市突然行得快，短時間升上三萬點，連高明之流喺11月6日叫人「博年底前見三萬點」、「年底博大市升，首選兩隻：騰訊（700）及平保（2318）」，都即買即中執雞成功，就知市況之強。
往後市況睇法好簡單，就係好似邱
吉爾話齋：end of the beginning，序幕已經結束。高明雖然喺11月頭反覆叫人就算唔敢買騰訊平保，都喺三萬點樓下買兩手盈富基金（2800）旁身，相信好多fans會跟，如果冇跟，一切已由三萬點重新出發。
上返呢啲咁重大嘅關口，波幅一定會增加。恒指要衝返上接近2007年高位實際上冇乜嘢值得驚，美股、香港住宅、車位、工廈等資產價格，四五年前已被人話「高位」，今日全部變曬低位。今日港股終於被推鬱，要贏錢惟有癲埋一份，更驚嘅係𠵱家冷靜，到大市上五萬點先all-in。
不過，上星期升得快嘅一段甚有啟示，不排除未來幾個月會重覆又重覆同一種市況，就係攻擊起點嚟自騰訊及平保。今次上三萬點最先係平保帶動，然後騰訊，一個撞牆去返平保單日升近9%，辣著大市氣氛。到大市上三萬點當日，呢兩隻股已經無份升，由一眾追落後股內銀、港交所（388）、匯控（005）、友邦（1299）後上。
啟示就係：騰訊平保11月升最多約27%，高位調整6%至9%都仲有好多空間。相反，追落後嘅一眾股份：一、今次急升普遍只得兩棍升幅；二、叫得追落後一定係升第一棍先衝，即只能享受第二棍；三、如果升上三萬點最興奮嗰日冇走，就算仲贏緊錢，都只係微利。
上述落後股，大部份升勢都係一浪高於一浪，長坐當然冇問題，但如果每次都以追落後形式買，一定焦頭爛額，所以睇落最難嘅追強勢，其實係最易贏錢。追落後嘅困難，在於買得慢，但走得要快。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com