中環在線：馬雲：月掙一、二十個億很難受
阿里巴巴創辦人馬雲一向語不驚人死不休，繼「有錢會很痛苦」後，馬雲日前再爆金句刺激普羅大眾，今次係每個月搵20億好難受！
佢喺自己地頭杭州出席第四屆
浙商論壇時講到，「一個月掙一、兩百萬讓人很高興，但一個月掙一、二十個億很難受。這個錢已經不是你的了，你沒法花了，你拿回來之後又得去做事情」。
網民想替馬雲受苦
馬雲金句一出，呢番說話隨即引嚟內地網民熱烈討論，仲激發咗網民們嘅創意，齊齊將呢番說話做二次創作。網民都想替馬雲受苦，「我好想難受一會，就難受一個月就行」，亦有啲係感同身受，「確實！雖然我一個月只賺一、兩千，但是我能體會到賺20億的那種難受！」最抵死係話馬雲取代咗「牛」，「以後別說吹牛，說吹馬。」
今次唔係馬雲第一次話做有錢人好辛苦，2014年阿里上市成功後，做咗中國首富嘅馬雲接受CNBC訪問時已經講，自己感到「非常痛苦」，佢解釋話，「有錢的確是好，做中國最有錢的人卻是不好。這是很痛苦的，因為當你是世界最有錢的人，身邊所有人都是因為錢而接近你」。
之後佢又講，一生最大錯誤係創立阿里，「我沒料到這會改變我的一生，我本來只是想成立一家小公司，然而它卻變成了這麼大的企業」。
唉，與其咁辛苦，不如真係諗嚇賺少啲，或者分啲痛苦畀其他人喇馬老闆。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com