【機會嚟喇】期待快樂聖誕（飛雲）（第153期）
2017-11-30 21:00:18
港股在上周突破3萬點大關，惜未能穩站於關上，本周二最低見29354，較上周三所造出高位30199回落854點。話曬都足足10年後再破關，當然無咁容易一下子企穩！再加上本周接連有利淡消息傳出，先
有中央截停北上，繼而有北韓試射導彈成功！嘩，咁好機會，淡友點會唔借勢發下圍呀！所以，就算美股破頂創新高，港股本周初都係要回氣！
係！無錯！大市上3萬關，股民們理應好開心，就好似我上期所講07年時一般，連出街食飯泊車都搵位啲！但實情又係咪咁呢？眼見就無！食肆唔見得特別旺場，身邊亦未見有太多人因為贏錢而興奮，更遑論全民皆股！早兩期提過的新股熱，隨著幾隻焦點新股登場後，熱潮亦略見減退。
不過，如此種種，更加令到我相信，大市今次可以突破上一次高位，甚至升得更癲，原因，就係因為仍然有相當多的投資者未入場！歷史是在不斷重演的，正如每一次的牛市，到了人人炒股、一街都係專家嘅時候，亦都將會係煙花開到最燦爛之時！之後係點，咪一片黑暗囉！
大家唔好覺得，我喺度嚇鬼！其實，正如我前面所講，歷史是在不斷重演的，香港的股民們，撇除90後的一代，對於牛市過後的慘淡，大都有所印象，08、09年，恒指跌到近1萬點，個市有幾差，散戶們應該猶有印象！大吉利是講句，一旦如此慘烈的熊市重臨，相信大家都應該有所經驗應對，不用太過擔心！最需要擔心的，大概都是一班90後股民。
更加重要的，是要出現煙花過後的黑暗，首先是要等煙花轟烈地爆個七彩，如今，終極大爆發都還未開始，又何用先來擔憂爆發過後的漆黑一片！換個角度說，這亦即是表示，大市應該還有強勁的爆升出現，升幾多我唔知，但我相信，突破07年的前高位31958將是基本。
事實上，以上周高位30199計算，距離07年高位不過1759點，要突破，套用一句網絡用語，真係「其實唔難」！只要騰訊（00700.HK）上到500元大關，加上幾隻中資金融股及友邦保險（01299.HK）推波助瀾，都未必要出動到大笨象匯豐控股（00005.HK）同埋中移動（00941.HK），都已經夠曬力水破關。無嘅，如果兩隻大龍頭肯鬱下，咪再上得快啲囉！隨時未到12月中已經到位，大家可以放個開心聖誕假！
講下講下，又講咗咁多，上期講過想同大家分享City is dying嘅原因，又無位講，唯有留返再下期啦！
機會嚟喇 - 飛雲 舊文
來源 source: http://www.winmoney.hk