唐牛唔止蝕騰訊牛
周顯唔買股鬧爆MPF
美國科網股散水，港股跟跌，恒指大插最多400餘點，騰訊（700）亦一度失守400元。蘋果真錢炒股FB直播節目《瑞銀呈獻：股票傳心師》的傳心師會點部署？竟然係坐定定唔鬱，因為神秘嘉賓周顯鬧爆MPF，個個掛住聽唔記得買股！
早前騰訊牛氣衝天，讀者群情湧
入建議傳心師追入騰訊牛證，買入後偏偏遇到調整，0.43元買入，今日午市已跌至0.148元，跌幅達7成！不過主持盧卡股同嘉賓唐牛，一致同意繼續留守，盧卡股話面對恒指季檢，基金沽貨，可以再觀望；而唐牛就解釋礙於節目倉只會於直播期間買賣，否則應該更早時間減倉或止蝕，並笑謂「現在止蝕都冇用」，盧卡股就語重深長地指「證明咗買股票唔可以只睇兩日」。
節目今次更請來神秘嘉賓周顯，老將周顯就氣定神閒指跌幾百點唔多，做股票應能承受20%、30%的損失，期後講講嚇講到去MPF，大鬧MPF應可以自行決定投資項目，如盈富基金（2800）、港交所（388）等大藍籌，或者買樓，謂「我覺得應該強迫儲錢」，但可以自行選撰投資而非強逼買基金，及在某些情況可以提取使用。
另一嘉賓瑞士銀行亞洲股票衍生產品銷售部董事卓素華就分析市況，指如投資者睇好後市，可留意恒指牛62401；若睇淡後市，可留意恒指熊68609；至於騰訊，若想撈低可留意騰訊牛62618，及call輪19115；若睇淡則可留意put輪19293。另一熱炒股平保（2318），睇好可留意call輪19164，國壽（2628）的call輪則有19003。
投資一周 - 周顯 舊文
來源 source: http://hk.finance.appledaily.com