智取大市：大媽炒經濟升級
■A股唔少舊經濟股炒到㷫烚烚，相信係炒定內地經濟升級潮。資料圖片
2017年港股一大特色，就係大媽進化成為超強投資者，往往先知先覺，喺搵到利好因素前幾個月，已經開始炒高某啲復蘇股份板塊，亦喺未見負面因素之前已提前沽貨獲利。你睇A股市場，大陸電子股份遠遠早過
外資基金愛股舜宇（2382）、瑞聲（2018）以至台灣大立光見頂，可見呢群投資者觸覺敏銳，香港投資者再唔進化，就好容易成為北水嘅點心。
茅台可以出年狂加價18%，股價升8%，返去《新華社》發文叫投資者理性看待茅台嘅水平，曲線話過各位聽，內地消費市道較官媒預想強得多。今時今日，A股唔少舊經濟股炒到㷫烚烚，絕不讓前排強勢嘅醫藥股、消費股專美，只要同經濟相關、非向下潛行業，配合龍頭或優質企業身份，就有得炒，係乜玩法？相信係炒定內地經濟升級潮。只要想像到如何受惠內地經濟復蘇，加上日線圖、周線圖走勢理想嘅股票，都具備持有價值。
假設內地經濟再起飛，電力需求一定上升，但傳統電力股股價向下深潛，與此同時風電股金風（2208）強勢破頂，光伏股信能（968）向上收復3蚊阻力，兗煤（1171）更加係走勢超強，究竟乜嘢葫蘆賣乜藥，下期再講。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com