智取大市：
短炒機會定係伏
■騰訊短線仲未確立反彈走勢，難旨意佢再度狂升撐住恒指。 資料圖片
騰訊（700）喺250小時平均線出現調整以嚟首個支持，股價一度從呢個水平大幅反彈，但20小時線又有阻力。高低位Chok夠半成，但最後形成咗大型陽燭陀螺，買賣盤喺380蚊至400蚊之間交戰，足
足有179億成交，但短線仲未確立反彈走勢。大上大落睇起上嚟有好多黃金短炒機會，但係實情係次次贏面低過一半。
最近除咗內地公募基金被監管機構勸喻咪沽A股之外，美國稅改大幅調低企業稅率至20%，同埋美國企業海外利潤滙返美國嘅稅率大減，令市場憂慮低稅嘅香港面對資金流走問題，拆息回升唔多唔少同上述因素相關，加上美國加息在即，加快港息追回美息，P都分分鐘要跟升，恐防影響埋樓價承接力，地產股唔駛點睇住。
仲有另一單值得留意嘅負面消息，內地11月份重卡銷量按月下降一成，按年下降9%，係年初至今首次按年下跌。重卡銷量算係經濟溫度計，多少反映內地經濟復蘇勢頭有阻滯，一批傳統工業股影響最大，而重汽（3808）股價早已由高位率先炒曬車，跌超過35%。
數埋數埋，上述消息影響港股資金流以至多範圍股份板塊嘅基本因素，加上騰訊高位交投大增，股價大上大落，亦難旨意佢再度狂升撐住恒指，還好流動性仍然充裕，股市冇直線下跌危機，令基金減倉都必然有秩序，Chok住嚟回調機會最大。目前有兩個策略，第一，以基本因素出發搵turnaround股，之前介紹Tapestry可能係其一，之後繼續尋寶。第二，人氣股份短線跌過籠就博反彈，騰訊跌到250小時線錄支持再反彈就係一例，但呢啲機會要耐性去等，瞄得好準先出手。
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.finance.appledaily.com