Can Bank - 散子 2017年12月5日
Can Bank：
炒新股條路如何走下去
■易鑫掛牌後不久，股價潛水至今。圖為主席兼首席執行官張序安。 資料圖片
自從易鑫（2858）之後，新股市場好似靜咗落嚟，易鑫到今日都未返到家鄉，只怪騰訊（700）投資概念大多，親生仔太少，物以罕為貴，在騰訊今日自身都難保之一下，概念到今日都未返家鄉。
雖然借爆孖展盛況曇花一現，但事實上新股數目未有因此而減少，反而仲陸續有嚟，只係大家反應明顯地無咁熱烈，就好似大家都好熟悉嘅清仔日清食品已經招完股，散子身邊雖然有朋友抽，但亦有朋友完全唔睇好，已經唔再有閱文（772）嗰時，有理無理孖展咗先講。
創板股仔1957& Co（8495）聽日會掛牌，根據輝立暗盤價只係高開一成。睇返港交所（388）披露，處理中新股，僅刊發申請版本招股書嘅新股已經有成百隻，即係話新股陸續有嚟。
咁講到尾新股仲有無得炒？易鑫之後，新股得個概念係未夠嘅，要點先得？不如還原基本步，短炒睇供求，新股規模細集資額少，一向都有炒賣價值，呢個亦係創板股仔明明都唔知佢做乜，股價都可以炒得起嘅原因，所以不妨搵返啲細細粒嘅，可能真係會容易食。其次盡量跟返證券行嚟抽，方便自已晌隻新股走勢唔多對路嘅時候，早啲晌暗盤甩手。至於長揸，咁梗係睇業務、行業估值呢啲基本因素啦。
散子
Can Bank - 散子 舊文
來源 source: http://hk.finance.appledaily.com