收市閒情：要Money還是要樽鹽？
■阿里搵到好人家，幾年風生水起。資料圖片
阿里同香港近幾年來關係，因愛成恨、愛恨交纏、拳來腳往，糾纏不清。簡單來講，根本就係一個拒愛後呻笨嘅故事。
從前有一對戀人，James同阿妮，佢哋真心相愛，諗住拉埋天窗，可惜……「唔得，我反對你哋結婚」估唔
到James爸爸大力拍枱，「𠵱家話就話我個仔娶你，但眾所周知，你家族行女權主義……」
「唔會架，佢同我媽媽住會好開心㗎……我求嚇你啦，Uncle！」「咩話，仲要搬入去？最後要我個寶貝仔入贅？話知你身家幾豐厚啦，總之我就唔贊成。」James爸爸咁樣一爆，事情就一發不可收拾，阿妮亦顯示本來真面目，「你哋成家咁老餅，我先唔恨同你哋做屋企人呀！我飛你個仔呀家陣！」阿妮講完呢句，就拂袖而去，James想追出去，爸爸拼命拉，「James，你係男人嚟㗎，唔好為一個女人，放棄尊嚴。」
你以為呢一個係一個拆散鴛鴦嘅故事？傻豬嚟嘅，學張家輝話齋「啲女人好古惑架」。阿妮轉個頭，就飛咗去美國嫁畀佢之前Keep住有Flirt嘅鬼佬。可能美國旺佢啦，阿妮喺嗰邊搞生意，越做越有米。事隔數年，阿妮已變身國際Ball場名媛，不時仲上電視同傳媒講「我搵咁多錢，真係好唔開心㗎，呵呵呵。」
事情去到呢度，你又會以為James同阿妮一段情，早已Game Over，一個擁抱Money，另一個就擁抱樽鹽（尊嚴）。有一日，James同阿妮出席同一場飲宴，遇見身光頸靚嘅前度，當年和平分手嘅咪最多Say句Hi，更何況分手係唔和平？
你又點估到，原來James帶埋佢奶媽一齊去，仲突然跪喺地，「阿妮，你不如返嚟James身邊啦。我哋屋企變曬啦，你睇，港交所都批咗同股不同權啦，James爸爸死咗啦，佢屋企樽鹽都打爛曬，你要返佢嘅，你想點就點啦。」
一開始係阿里求香港，去到後來阿里搵到好人家，幾年風生水起，香港就跪地餵豬乸。香港同阿里嘅關係，喺錢面前，冇話對錯嘅，但肯定嘅係，呢套一定係一套Cult片。
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.finance.appledaily.com