Money Walker：把握今年投資主題
■主宰環球通脹嘅國際油價兩年前見底，呢兩個月成功突破橫行區。資料圖片
如果去年第四季嘅宏觀經濟主題係環球各國同步出現復蘇，咁今年第一季嘅主題一定係通脹有加速跡象。
通脹二字雖然已經講到爛，但一直只係憧憬，至最近先真正有較實
質證據出現。主宰環球通脹嘅國際油價兩年前見底，但成功突破橫行區間則係呢兩個月嘅事；作為聯儲局通脹指標嘅美國核心個人消費開支（Core PCE）亦要到去年8月先由跌轉升，但11月仍報1.48%，與2%目標差距甚遠；內地食品股加價潮更係剛開始。
大家不妨留意住上述指標，以判斷環球通脹加速趨勢能否持續，兼把握好呢段通脹加速但又不至過熱嘅黃金時期，部署定商品股、資源股、工業股、消費股等。呢刻暫時仍然係環球物價上升初期，情況未見大範圍傳導至工資水平之上，所以擔心通脹過熱仍言之尚早。一旦物價上升至各國央行需要透過加快加息步伐去壓制物價升勢之程度，先係今輪經濟復蘇由盛轉衰之時，但筆者相信未必係今年嘅事。
翻查世銀數據，金融海嘯前，環球通脹由2007年5.35%，升至2008年海嘯當年嘅8.95%。2017數據未出，而最新2016年數據顯示，環球通脹只得1.61%。當通脹遠不至成為威脅，央行多年來不斷放鴿係正常不過，筆者唔認為市場低估儲局今年加息次數，預期全年加兩至三次非常合理，四次已經係極限。
題外話，近期外資大舉湧入亞洲股市，亞洲多國股市指數創出數年甚至歷史高位。筆者有感呢輪升浪係透支緊接下來嘅業績期有好消息，投資者要小心一旦第四季業績期稍為交唔到功課，亞股或會出現調整。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com