內地券商購物名單
2018年01月10日
港股連升11日，內地股市都唔失禮，今年基本上未嘗一跌，上證指數連升八日，收報3413點，升4點；深證成指收報11447點，升64點。港股咁強，皆因美股好之餘，內地都跟得上，香港變咗想唔升都無乜理由。要留意係外電引述消息報道，人民銀行近期已通知
人民幣中間價報價行，調整人民幣中間價形成機制中的計算方法，令人仔有啲下跌壓力，咁對中港股市氣氛可能有啲影響。
人行自去年5月26日在人民幣對美元匯率中間價報價機制，引入咗逆周期因子，呢個因素係希望緩解外匯市場可能存在的羊群效應，用咗呢個因素嚟調整後，人民幣匯率顯着上升，加上美元弱勢，去年人仔全年中間價累計上升超過6%，成為9年來最大年度升幅。如果以人民幣年升6%速度，長遠好難維持，所以壓一下只係時間問題，依家外界對中國經濟信心好番啲，情況比較穩定，央行選擇呢個時間郁手，照計應該唔會有好大問題，但短期仍要留意人仔走勢變化對市場信心有無影響。
10隻熱股唔買都要知
大市呢排旺氣四散，打破埋2012年創下10連升紀錄，創出19年以來最長升浪，連漲11日累積上升1777點，騰訊曾創上市新高，見446.4元，恒指收報31011，升111點，成交金額1334億元。國企指數收報12255，上揚20點。
港股呢期向好，理由之一係內地股市自去年底調整後持續回升，少咗一瓣拖後腿，內地投資情緒變化，所以都值得關心，唔買都要知吓。最近，內地《和訊財經》就根據各大券商按照「業績與估值相匹配」的原則，揀出推薦次數最多的10隻個股，分別為：萬科A、中興通訊、清新環境、宜通世紀、中天科技、烽火通信、南方航空、三一重工、五糧液、平安集團。
這些A股部份有在香港上市，另外最多係5G概念股，合共有有4隻，分別是中興通訊、宜通世紀、中天科技、烽火通信。睇番香港掛牌的萬科(2202) ，今年表現都好靚仔。萬科之前兩年管理權被狙擊，一度影響運作，喺競爭激烈的大陸市場陷入落後。自從股權之爭解決，萬科動作多番，股價開始大力追落後。
平保(2318) 就係去年表現最好的金融股之一，內地券商認為佢以金融+科技構成平台雙輪驅動戰略，在提升傳統金融業務競爭力的同時，還可以獲得輕資產和輕資本的收入來源，公司展現對金融科技板塊未來盈利和估值增長強烈預期，投資機構看好公司技術輸出對淨利潤的貢獻。內險股調整數日後，周二表現回勇，平保(2318) 升2.5%收報84.3元；中國太平(966) 收升2.6%，報31.7元；新華保險(1336) 則漲1.6%，收報54.15元。
5G概念香港未算熱炒
內地開放機票價格，航空股喺年頭紛紛發力，券商特別鍾情南航(1055) ，係因為公司國內線客座率同比增長3.55%，國際線客座率持續按年提升。同時，廣州和烏魯木齊樞紐分別在歐洲至大洋洲中轉航線和絲綢之路經濟帶上具有地緣優勢，北京新機場又將於2019年投產，這些都成為公司提升區域競爭力的重大機遇，提升國內線收益水平。
至於5G概念中，港人最熟悉係中興通訊(763) 。隨著5G建設的加快，產業鏈上的企業將在未來幾年全面受益，故此看好中興中長期發展。同時，公司與多個海外運營商達成了5G戰略合作關係，有望憑借其領先技術和實力進一步提高海內外市場份額。中興呢排無隨市上升，昨日收報30.15元，相信係因為本地股民對5G概念股無咁熱衷。由於內地A股喺全球股市仍算落後，若然今年內地股市追落後，咁呢啲內地基金的購物名單，都有留意的價值。
陸羽仁
金融High Tea 舊文
來源 source: http://hdfin.stheadline.com