【大茶飯】九倉幫你買騰訊（青冰）
本港的新經濟股份唔多，而九倉卻買咗153億，而大家卻沒有在港交所權益披露見過九倉舉牌，換言之目標股份市值相當大，照咁睇，冇買騰訊(0700)都冇人信吧。更多
九倉(0004)上周被恆指剔除出成份股，取而代之的是分拆出來的九龍倉置業(1997)，這個被投行
認為係系內重組的第一步，就係想先釋放手持一級物業的價值，花旗於去年發表過報告，稱九倉將會被私有化，因為九倉的市值因分拆而變細，屆時拎錢出黎都係三、四百億，但九倉揸住的現金卻有270億，十分化算，但市場卻估不到，第二步就係跣你一鑊，拎二百幾億去買股票。
按管理層透露，255億的股票投資，有六成係新經濟股份，另外四成為地產相關企業，因為買地都唔係一時三刻買得到，所以買NAV存折讓的地產股，有4%股息收，比揸零息的地皮好。本港的新經濟股份唔多，而九倉卻買咗153億，而大家卻沒有在港交所權益披露見過九倉舉牌，換言之目標股份市值相當大，照咁睇，冇買騰訊(0700)都冇人信吧。在某些的報章，看到管理層說會投資中、美的新經濟股份，包括幾個大家熟悉的平台，咁好有可能係阿里巴巴、京東及亞馬遜。
如果你有跟開本港的中小型股份，每當佢地賣咗資產大賺一筆，資金回籠後更係希望佢同股東分享，派特別息嘛，不過唔派都唔緊要，最怕最忌的就係佢地繼續發揮錢搵錢的精神，喺唔知邊度又搵到個優質資產，大手買入，又或者發展一個燒錢的項目，屆時個市場反應一定係先沽而後快，事有湊巧，九倉上周公佈這個買股大計後，翌日急跌6%。講真，無論騰訊及新經濟股份幾掂都好，小股東要買都可以自己買啫，點解要勞煩你幫手呢？
青冰即時跟進花旗在業績後如何解畫，佢地仍然死撐私有化係中期目標，只待適當時間，回帶睇番1月3日佢地狂吹私有化，加上個市火熱，報告一出就將股價由28.15元推上30.60元，一星期內更高見34蚊，咁依家被管理層跣咗，都唔係太差，仲高過推介當日嘅。
老牌華資私有化或重組，咁易俾你捉到咩，少年你太年輕了。
Fb個人專頁 http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com