智取大市：大價股取勝關鍵
■大行對騰訊舊年第四季業績期望唔算太高，靠業績再下一城、股價短期內破頂機會不低。 資料圖片
上期講到，股市未足夠反映聯儲官員預想嘅「過熱」，大概可從估值去睇。恒指市盈率14倍唔夠，同2015年大時代相若，但2017年業績會見到企業盈利增長，估值再拉低，即大概
仍比大時代便宜。學前輩黃國英所講，要拋開指數迷思嘅話，拆開各個股票板塊，你仍會發現絕大部份情況下，最多只見估值偏貴，而非去到離譜水平，例如匯控（005）仲係市賬率唔夠1.2倍。今年咁多大公司來港上市，港股高成交亦有望比2015年更長期持續，但港交所（388）股價仍未超越2015年大時代水平。可以想像到，大價股其實有更加「過熱」嘅空間。
大價股升唔升得起，要視乎投資者會唔會重拾2月跌市之前對ETF同被動投資嘅熱情。外電講到，歐洲大戶繼續買入美國大型科技股基金，當然買多買少先係關鍵，但起碼見到冇負面因素纏繞嘅科技股的確走強，似乎好友自從2月被技術性擊倒之後，再衝返入場買大價股嘅機會仍大。睇周線圖，大藍籌偏向尋獲支持，有條件再發力。
大行平均估騰訊（700）舊年第四季盈利按季輕微倒退、收入按季升半成，市場期望唔算太高，靠業績再下一城、股價短期內破頂機會絕不低。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com