金手指：弊傢夥！俄鋁溝唔到
■俄鋁唔缺錢，只係缺畀錢還債渠道。 資料圖片
上周孫柏文話大手撈嘅俄鋁（486），創咗喺香港上市新低。而喺我fb，有好多人問我有冇再撈？答案係，冇。原因係我幫親開嗰間都禁咗買，想溝都唔得。搞緊喺其他行開戶口。咁我係咪坐緊艇？係。不過我話到明係睇過終點，即係
一係揸到執笠，或揸到冇事正常化。
上周講過公司基本因素，今日講嚇政治分析。我請教一個喺英國間諜搖籃、倫大學院UCL東歐政治學系嘅一級榮譽畢業生。佢話細心留意，俄羅斯係未出手。之前話借錢畀俄鋁，根本係多此一舉。因俄鋁根本係唔缺錢，只係缺畀錢還債渠道。
最重要係所有挺普京嘅俄羅斯財伐，都睇緊呢單嘢。如果搞唔掂，例如搵唔到方法同美帝擺平，或者諗唔到竅門畀俄鋁出貨收錢，就會圍堵普京。所以普京死都要死個方法番來。佢話：「俄羅斯人好要面，今次如果輸畀美帝，直情等同日本侵華成功咁。」
我國亦一定睇實。因俄鋁有造戰鬥機必須嘅鋁，喺俄羅斯有六萬個員工，如果以人口比例計，相當於一間喺大陸有60萬員工嘅公司。係咪美帝出張memo就可隊冧？係嘅話，咁破壞力咪等同核武？所以呢單嘢一定要諗計化解，如果唔係，美帝就會不斷用，到時點算？日日嘈知識產權被華侵嘅特朗普，下個搞阿里、騰訊（700）？
最後，唔知國金頂樓嘅金管局有冇收order晚晚通頂度竅門。因中俄造個美元區以外交易系統嘅需要，已達燃眉之急。呢單嘢真係有趣。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com