財路：資策大把優質資產
■資策最新年報顯示，渣甸山白建時道47及49號高檔住宅計劃於今年第三季度出售。 資料圖片
資本策略（497）連埋資產重估後PB得0.22倍，揸住物業，唔理係乜類型，大部份都喺市場出售，肥仔價值得到反映之餘，實實淨袋現金，更加穩陣，資策有得諗。
資策到今年3月尾NA
V1.17元，現價0.435元，PB0.37倍，已經有唔錯折讓墊底，以集團上年度年報作準，資產重秤後NAV1.9元，PB得0.22倍，即係現價8折有售。
香港講土地供應，唔好話十劃有一撇，就連一點都未見，樓市繼續火辣辣，喺呢個前提下，資策揸住物業資產，有進一步升值潛力。
再講，資策家陣揸住嘅，包括位於渣甸山白建時道47號及49號，另山頂道8至12號項目，兩個都係位處頂級地段，有再增值空間。
資策2018年（3月底）合共銷售約為91.4億元物業項目，當中，未確認金額約39億元，又年報講，資策位於些利街2至4號項目進度理想，今年頭開始售，兼完成若幹層辦公樓層預售。又集團同億京發展同信置（083）合作九龍灣偉業街項目，亦都進行預售，當中，可供出售樓層中40%，亦已經喺短期內預售。至於上邊兩個山頂頂級項目，資策計劃今年第三季同明年初推出。
睇到係，資策不論住宅或者商業項目，係透過出售，而增值部份得到實實淨反映，兼變現回籠。又隨住集團已預售待反映，或正預售中項目入賬，一樣支持到資策嚟緊日子，有靚仔成績單。
煲資策，當PB收窄到重估前0.37倍，都講緊要升68%到0.72元，呢個目標PB水位，安全到爆！
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.finance.appledaily.com