「騰騰」震
2018年07月31日
港股臨近月尾，反彈暫告一段落，指數向下之餘，市況個別發展。傳統股份向好，但科技股受外圍拖累，重磅股騰訊(700) 向下大插近10元，場面不無震撼，就算收報369.4元，跌咗3.6元，都嚇到小股東震震變咗「騰粉」。
傳統股呢期發威，
多少係跟住外圍炒作，最明顯係本地銀行股恒生(011) 高見214.2元，收漲1.1%，報212.6元。美國銀行股增長強勁，恒生本身生意穩定，成為追逐優質股得益者。內銀受內地打貿戰陰影，甚至連中銀香港(2388) 都受心理影響，令恒生一枝獨秀。
中國建材低撈又叫胡
另一個強勢傳統板塊係水泥股，海螺水泥(914) 、亞洲水泥(743) 、天瑞水泥(1252) 都創咗今年新高跑贏大市。內地首季水泥行業利潤總額總額為190億元人民幣，創咗歷史新高，主要受益供給側改革。第二季為水泥需求旺季，隨著建築工程全面復工，水泥價格可望繼續走高，全年預計保持高速運行。
過往水泥行業價格上升，產能隨即增加，觸發調整循環。早前內地公佈的數據，反映水泥行業喺控制產能方面，仲係維持較好狀況，原因相信係內地對環保要求提升，加上行業自律性加強，所以數據公佈後，觸發咗水泥股新一輪升浪。
受惠水泥股升浪，建材板塊都做好，但升勢就稍為落後。有中環茶友手頭入咗啲中國建材(3323) ，實行高沽低買。早排佢見股價創咗新高，升破10元水平，高位實行分批食胡，跟住個市喺貿戰陰霾下插，最低股價竟然插至近7元水平，回調接近30%，佢喺8元樓下分批回補兼買突。昨日中國建材股價喺水泥股帶動下收報8.75元，升逾2%，同佢撈貨價比平均升逾一成以上，計落都幾和味。茶友話，水泥建材股第三季應該都保持到唔錯勢頭，所以佢準備再坐一會，等9元樓上先決定係咪分批食胡。
科網股昨日繼續受壓，牽動大市升跌。
早段騰訊急插，恒指一度挫逾200點，之後騰訊跌幅收窄，大市收報28733點，跌幅減至71點；國企指數收報11046點，只跌1點，成交723億元。騰訊曾失守370元支持，挫逾3%低報361.6元，見近九個月低位，收報367.2元，仍跌1.55%，佔恒指44點跌幅。其他藍籌科網股方面，舜宇光學(2382) 挫1.88%，收報136元；同屬科網股的小米集團(1810) 跌1.9%，收報18.68元。其他股份內房股碧桂園(2007) 急挫7.5%，收報12.14元；吉利汽車(175) 挫2.93%，收報17.88元。
貿戰隨時波及科網股
雖然騰訊尾市企番穩，但呢排大行輪流唱淡佢，暫時都仲未肯定佢尾市回穩，係咪大戶「臨危托沽」，喺尾段收一收手，等佢調整幅度無咁驚嚇。騰訊今年初率先見頂，外圍科網股到O依家先開始調整。佢會唔會先跌先見底，暫時就唔敢過份樂觀，所以後市仲有可能要睇外圍科網股調整係咪告一段落。
外圍科網股短期焦點落喺蘋果業績。在派成績表前，英國《金融時報》報道，蘋果將被迫提高旗下智能手錶(Apple Watch)、AirPods耳機和HomePod音箱等在美國售價，以應對美國計劃對2000億美元中國製造產品加徵10%關稅影響。蘋果競爭對手的智能語音設備，例如亞馬遜(Amazon)的Echo、谷歌智能家居(Google Home)，還有Fitbit的智能手錶，亦可能會受加徵關稅影響。摩根士丹利上周發表研究報告指出，在蘋果可能於九月發佈下一代iPhone前的這段時間內，中國與美國之間日益火爆的貿易言論，會對蘋果股價構成風險，所以外圍科網股呢排表現，可能都幾唔穩定吓。
陸羽仁
金融High Tea 舊文
來源 source: http://hdfin.stheadline.com