金手指：今日fb明日騰訊？
■騰訊主席馬化騰。 資料圖片
facebook上周四單日跌兩成。孫柏文見朋友利世民喺fb分享周末十一少兄喺本報嘅專欄。講到喺fb上周公佈強差人意業積，股價大插水前，佢嘅創辦人兼大股東、行政總裁，係咁沽佢手上嘅股票。
老實，我真係摸唔透佢今年起加速售股嘅真正
理由，係咪真係聞到半年業績有機會出事而賣股。不過呢單嘢確實有幾個位係值得香港股民諗諗。
第一，一間高增長嘅公司，亦因為咁，極高估值，係咪永遠都係可能維持咁嘅增長。fb其中股價大插插嘅理由，係因為佢嘅旗艦，fb本身開始飽和。冇辦法，全球廿億用戶，睇落似想用嘅已經用緊。係咪再上唔到客呢？
呢個我亦係為所有騰訊（700）嘅股民擔心。騰訊喺大陸用戶上客，冇可能唔飽和，所有亦有隱憂。每個用戶搾出嘅錢係咪可繼續增長？
再講，fb盈利其實超預期，強差人意嘅係營業額。即係營利質素開始下跌。呢個睇上次業績，騰訊又係有咁嘅感覺，好多紙上盈利。所以個市彈都好似冇騰訊份。
喺花旗國，fb股東中開始有聲音話要炒創辦人魷魚。不過唔好玩啦，佢哋最愛嘅同股不同權令呢個要求停留喺發夢階段。因普通股民，得股份，冇換人投票權啊。當然，香港人炒咗大陸公司股票咁多年，都應該冇遐想話有能力換管理層，不過你買啲同股不同權嘅嘢，就有心理準備，要啞子吃黃蓮，有苦自己知。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com