【大茶飯】國泰反底要做咩？（青冰）
近年可能真係對沖蝕得勁，國泰在多方面都縮減成本，所以員工福利及士氣都低，長期係咁，要打翻身戰都唔易。更多
2018年全球最佳航空公司上月公布，新加坡航空重奪首位，而前冠軍卡塔爾航空跌落第二位，青冰上月外遊所乘搭的阿聯酋航空，仍是第四位，而國泰航空(0293
)則跌落第六位。國泰上周亦公布咗上半年業績，仍虧損2.6億元，較眾大行預期可扭虧的願望，有一點落差，但最受市場留意的對沖油價虧損，已經減少至6.5億元，市場現時的共識就是下半年將會扭虧，令全年盈利見正數，確認業績正式走出谷底。
國泰近幾年的困局，就係早幾年在油價高位時重手做落一大堆對沖，遇上15及16年油價大跌至低於30美元水平，兩年都因對沖虧損逾80億元，最弊就係之後油價反彈至60美元，去年都仲係有64億對沖虧損，所以今年上半年只係蝕6.5億，大家都覺得雨過天晴，以後只會扶搖直上喇。不過青冰看過15至17年的六份業績，15年全年雖因對沖而輸了84億元，但那年度盈利仍有60億元，而17年度對沖輸64億，即係少左20億啦，但去年純利仍蝕12億元。
可能因為燃油對沖大額虧損幾個字太深入腦海，令大家普遍認為之後輸少啲，就代表冇事喇，不過事實係今年對沖損失只有6.5億元，但整間公司仍然係蝕，青冰再用15年及18年上半年作粗略比較，發現營運收入分別係50億及53億，三年的收入增長有6%，不會是太理想的成績吧。
青冰並非飛行常客，搭國泰的次數極少，不敢以第一身妄下判斷，但從看到的新聞及資料，似乎佢地短途航線近年被廉航步步進逼，日航在5月中宣布開展廉航，一直唔想踩入呢個市場的國泰，也改口風話never say never，究竟之後係點可以多加留意，而近年可能真係對沖蝕得勁，國泰在多方面都縮減成本，所以員工福利及士氣都低，長期係咁，要打翻身戰都唔易。
順帶一提，他們未來幾年的燃油對沖政策將轉為保守，合約對沖的年期仍會縮短，唔會再做4年咁長，比例亦不會多於5成，呢個亦係比較穩妥及實務的操作，相信大行分析員會喜歡，日後股價是否可以回復正常，焦點應該會離開油價，並說服市場如何增加收益喇。
Fb個人專頁 http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com