智取大市：最怕騰訊掀斬倉
■騰訊今日公佈業績，萬一業績遜預期，相信會掀起龐大單日斬倉潮。 資料圖片
間中都會聽到，等恐慌性拋售之時先撈貨，相信呢個恐慌性拋售，已經出現緊，先喺8月頭有一段連日跌三幾巴仙，日日跌，小洗倉後企穩幾日，就變做大洗倉，周一先嚟教育股，周二殺到去科網股，咁洗倉法
，相信大家好難見到所有股份單日全面恐慌性拋售。於是要尋找呢一轉個底部，已經唔可以用指數去量度，有可能每個板塊個低位會出現時差，於是要逐個板塊、逐隻股份evaluate。
一隻舜宇（2382）單日蒸發逾300億市值，就令投資者瘋狂斬倉，說明咗幾樣嘢，1）一隻由坐定粒六增長股，變成被質疑嘅增長股，估值下跌幅度可以超乎想像；2）潛在最危險嘅地方，其實係大家一直覺得最安全嘅地方，一隻大安旨意穩穩陣陣嘅好股，業績一衰，殺傷力仲大，正因為當初大家覺得佢信得過，於是有人用佢做孖展，佢意料之外大跌自然有人要斬倉，搵佢啲師兄弟股份祭旗。
騰訊（700）周三公佈業績，佢個size係舜宇嘅幾十倍，萬一業績遜預期，相信又掀起更龐大單日斬倉潮，真係要提防。好就好在，今次市場對佢盈利expectation不高，點都好，祝願企鵝平平安安。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com