加息期要防抽水陷阱
2018年08月15日
恒指昨日再插183點，但跌幅唔算全面，只係高估值板塊輪流爆破，周一插完教育股，昨日掉轉槍頭再插科技股同高估值嘅手機股，大市雖然喺午後跌幅收窄，呢批股份回頭已是百年身。
新一輪大插股份有兩個焦點，一隻係手機設備股舜宇光學(2382
) ；另一隻係股王騰訊(700) 。大插到標晒血的舜宇光學，死因係中期業績唔靚仔，公司期內收入按年增19.4%，至119.76億元人民幣，表現被指遜於市場預期；純利僅增1.8%至11.8億元，每股盈利1.08元，無中期息派，結果咁就出事，股價公佈當日微跌，到翌日股民如夢初醒，股價最低去過86.6元，收報91.9元，狂跌24.1%。一隻原本有1328億市值的巨股，可以一日唔見咗近1/4市值，單日蒸發咗超過300億元。
閱文光大插幅驚人
舜宇爆災，其實都無乜好講，過去半年陸羽仁不斷重申，手機股估值嚴重偏高，無理由佢哋靠蘋果搵食，市盈率高過蘋果幾倍。O依家佢嘅盈利近乎無增長，高估值無法支撐好合理，所以佢哋大跌唔係異常，而係撥亂反正。舜宇一隻純利無乜增長的股份，跌完仲有28.7倍市盈率，睇落仍然係貴。蘋果股價呢排屢創新高，舜宇就背道而馳，說明咗邊個係莊，邊個係閒，大浪一沖，買貴股的投資者就無褲着。
同日大插仲有騰訊，市場喺佢公佈業績前，借住有遊戲下架的消息，股價一度大插近20元，收報348.6元，下跌12.4元，跌幅3.4%。不過更加值得一講的係，佢同下屬閱文(772) 的交易，閱文上半年收入為22.83億元人民幣，按年上升19%，純利按年大增1.39倍至5億元，每股盈利58分。閱文公佈業績同時宣佈，以現金加股份代價155億元，向騰訊(700) 收購影視製作業務。交易公佈後閱文股價急插，而且無乜反彈，以接近全日低位55.6元收市，大跌11.4元，跌幅14%。
閱文今次交易以部份現金作價，牽涉52億元，是上市集資額的70%，有點削肉還母的味道。本來閱文上市集資，外界估計係用作投資，現在反過來支持母公司，因而令股價大跌。騰訊最近股價雖然跌得多，但由於過去一年升得勁，O依家仲未去到一年低位，閱文則已經見掛牌後新低，除了抽新股中籤的股東，基本上掛牌後買股者都中招。
騰訊要閱文削肉還母，有可能係預先計劃，但亦有可能係反映咗美息向上，同市場資金漸緊情況。科網巨頭雖然現金流勁，同時市值驚人，但無論喺投資發展影片娛樂同乘車服務，樣樣都要燒錢，戰線好長，而且對手全部都係同級巨企，所以「家用」都唔少，當家者都要諗吓點樣可以搵銀撐住，所以有水抽時就要抽，做呢啲公司的小股東，就要明白今時唔同咗往日，要做好心理準備。
受不利交易影響的股份仲有光大國際(257) ，集團建議27供10，發行16.6億股，每股供6元，較公佈前收市價8.75元折讓31%，集資淨額99億元，擬用於落實現有及日後的垃圾發電項目；發展其他環保業務，包括技術研發、裝備製造、垃圾分類與管理以及大氣治理與檢測服務，當中唔知有無機會日後向阿媽買嘢。消息公佈後光大國際急插到6.9元，大跌21%，由於供股比例大，若然個市再差啲，都唔知會唔會迫近供股價。由於美國息口仲會上調，內地資金緊張，公司抽水可能成為股民陷阱，投資者入市時要加倍留意。
公用股升大市未到石底
喺資金避險意識大增下，恒指一度下插逾400點，收報27752點，跌幅收窄至183點；國指收報10744點，下滑22點，成交1024億元。手機股全線下挫，瑞聲(2018) 創逾一年低，收挫7.15%，報85.75元；高偉(1415) 挫7.14%，收報1.43元；丘鈦(1478) 挫5%，收報5.74元。科網股金山軟件(3888) 發盈警，股價創逾兩年低位，插19%，收報13.18元。
跌市中有穩定收入兼唔會抽水的股份，反而成為避風港，滙控(005) 逆市升0.35%，收報72.35元；更明顯嘅係公用股，中電(002) 大升3%，收報93.2元再創新高；煤氣(003) 升1.6%，收16.18元，連最近連爆輿論炸彈的港鐵(066) 都升0.8%，收報39.8元。公用股有得升，反映資金仲未完全撤離，但亦可能代表個市仲未跌到去石底。
陸羽仁
金融High Tea 舊文
來源 source: http://hdfin.stheadline.com