異動空間：挾完倉一樣要跌
■阿爺突然出招挾人仔，但相信結果只會是挾完再落。 資料圖片
阿爺突然出招挾人仔，情況有如股市勁插一輪之後，忽然來個「回馬槍」挾淡倉，兩者結果都係一樣：挾完再落。
執筆時黑期反彈279點，ADR更漲300點，但近日每逢高開，沽盤有如喪屍般湧出，恒指28000已由
支持變成巨大阻力。指數撐唔撐得住？還看中午公佈的滙豐控股（005）業績。
阿爺加碼向600億美元進口貨徵稅，相比起美國早前的2,000億美元，個額明顯「輸咗」，但值得留意，大陸每年向美國進口總值僅1,300億美元，而美國向大陸進口則達5,000億美元。連同早前已落實及「準備好徵稅」的500億美元貨品，中國再叫陣的空間已無多，再玩落去不出以下幾招：一、加重關稅稅率；二、針對性攻擊美國巨企，例如蘋果、波音，搞到佢哋在大陸搵唔到食；三、限制大陸人去美國旅遊、甚至留學，斷美國服務業一條財路。咁搞落去，貿易戰變經濟戰，甚至科技冷戰，當全球兩大經濟體一齊收縮，再遇上全球收水，呢種痛目前就反映在股市之上。
貿戰爆發後喪炒一輪的華虹半導體（1347），周二業績前終氣力不繼，「三頂」形態初步確認，23.5元的支持位不容有失，否則升浪將會告終。
筆者為證監會持牌人，未持有上述股份權益。
魏力
http://fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.finance.appledaily.com