智取大市 - 晉佳 2018年11月30日
智取大市：唔加息真係好？ - 晉佳
鮑威爾終於改口風話息率接近中性水平，暗示加息周期就嚟完結。 資料圖片 適中字型 較大字型
聯儲局鮑威爾不負眾望，改口風話息率接近中性水平，暗示加息周期就嚟完結，真係一件好事？
特朗普之前連續八次（沒正式統計）炮轟鮑威爾，點解特朗普咁唔想加息？第一，加息令美金強，特朗普一向強調美金過強會影響競爭力，呢個講法喺貿易戰發酵時先真相大白；第二，如果繼續加息，特朗普再對中國出重招，對於美國本土經濟構成更大壓力，若然美股頂唔順大跌，步入經濟真正衰退，佢就變千古罪人，政治太不正確，相信冇一個總統想以後被投資者吐口水。
相反，如果美國快將加完息，有一項利好因素頂住，特朗普周六見習近平時，有利佢更進取地向中國發動攻擊。之前本欄都講過，美國喺息率同貿易戰因素上有平衡的必要。
港股今個星期初大炒加息周期完結憧憬，但習特會呢？一來一回之下，兩項因素有可能互相抵銷。於是直至周三嘅股市反彈，炒咗加息周期完結憧憬，但未計及特朗普發難機會增加嘅風險，算係輕微炒過籠，只不過習特會前正值對沖基金年結，風平浪靜趁機挾高而已。無論特朗普同習近平喺周末握曬手做乜都好，除非有好實質和解協議誕生，否則市場唔會相信嚟緊有和平日子過，咁代表要睇淡麼，又未必，稍後講明年展望，會分唔知幾多期去講。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com