等執位起過風有着數
2018年11月30日
習特會前夕，美股大升逾600點，但港股高開後，果然引起短線客喺中美峰會前獲利回吐，恒指先升後跌，個別股份回調幅度頗為明顯。
中美關係錯綜複雜，陸羽仁同一個內企高層談起，佢認為美國現時用政治去考慮經濟問題，變成錯配，實質上全球產業鏈你中有我、我中有你，美國
要同中國割斷經濟聯繫，這是不可能的。美國要把中國職位帶回本國，從產業配套上也是不可能的。
傾成或小升 鬧翻可大跌
現時美國希望和其他國家聯手應對中國，要考慮的是目前中國中產人口已達四億人，已經超過美國或日本人口，而且還有幾億人會陸續變成中產，這樣的市場，是要發展經濟的國家難以放棄的，所以美國真的要搞制裁中國也不容易。
他認為，美國要和中國打貿易戰，對本身也很不利，經濟受影響，同時入口貨又貴了。如果貿易戰持續，增長放慢，通脹又升，局面就難搞了。
中美兩國元首拗手瓜，外界看來有機會達成一些協議，但就算有協議，也不表示風平浪靜，因為特朗普是選舉動物，經常諗住點樣討好選民，所以就算有協議，去到某個時間，佢可能又會出招玩嘢。
特朗普愛玩嘢另一個不能忽視的因素，是他不屬於共和黨內的當權派，只係蜀中無人，俾佢由政治初哥爆冷勝出，正因為咁，他要一直玩嘢唔停得，因為一停無咗選民注意力，佢就好可能俾黨內主流踢走。
從呢個角度講，佢呢個總統要無時停，都做得好辛苦。
牌面上睇，習特會即使達成一個框架協議，外界開心一陣，好快會對細節有懷疑，大市有可能會在上升時，出現有好消息出貨的局面，好難一直向上。
另一方面，如果不達成協議，角力必然升級，美國有可能向所有中國貨全面徵稅。
會前就有報道指，美國正研究將由中國入口到當地汽車關稅，提高至40%。國家商務部發言人高峰回應重申，中美經貿合作本質是互利共贏。
由此可見若然今次傾唔掂，咁港股呢輪反彈可能已玩完，有機會又再下行。
睇完談判的可能結果，好可能係有協議先升，跟手獲利回吐，之後先再炒過。
鮑威爾放鴿 益咗地產股
若然無協議就大跌，屆時就要等中美政府出來收拾局面，大家唔好以為只係阿爺要出手護盤，美股都一樣有機會大插，咁就特朗普都要絞盡腦汁拆彈。
所以從值博率去計算，就算兩國有機會取得一些成果，但大戶都已經計過晒數，都係短線先食胡，等會後重新執位起風再打過着數啲。
恒指波幅大 航空股看俏
大戶有心計數，美股勁升正好畀他們一個食胡機會，恒指先升後回，全日波幅超過500點，恒指收報26451點，跌231點；國企指數收報10584點，成交金額902億元。藍籌喺跌市中表現乏力，騰訊(700) 高開係威係勢，曾彈1.7%，收跌0.9%，報312元，終止三連升。從沽空金額有120億元嚟睇，可見都有人買今次會開細。
美國聯儲局主席鮑威爾周三在紐約發表有關息率言論，指目前利率「僅僅低於」中性水平，和10月說法不同。
市場解讀為較溫和的鴿派言論，可能明年只加一次息，刺激地產股造好，新地(016) 逆市升1.1元，收113.3元，升1%；恒基(012) 升0.8元，收40.1元，升2%。儲局放鴿，對金價都有利，金礦股係另一受惠份子，招金(1818) 收升4%；山東黃金(1787) 收升2.5%。
油價回軟，航空股喺跌市中有表現，國泰(293) 營運數據好，開市彈升，收市仍有2.2%進帳。
另外，震雄集團(057) 與Team Empire和Gaw Capital簽署框架合作協議，共同發展集團旗下三幅位於深圳坪山新區地皮，總地盤面積約為55.15萬平方米。
震雄股價飆升，最多急漲56%，見3.5元，收揚29%，報2.88元，成交仲衝上1582萬元。
陸羽仁
金融High Tea 舊文
來源 source: http://hdfin.stheadline.com