魚樂無窮 - 唐牛 2018年12月20日
魚樂無窮：趁年結檢閱持倉 - 唐牛
必瘦站分拆中國及澳門業務再行前一步，上市委員會已開綠燈。2元樓下試放買盤，話唔定會執到死雞！資料圖片 適中字型 較大字型
聖誕新年假期將至，唔少基金大戶相信已完成埋數，要買嘅買曬，要沽嘅亦沽曬，計好成績表畀客戶睇，執埋書包去過年。無怪乎成交越縮越少，指數慢動作上落，唔講以為死機。雖說儲局有議息結果，除非突然宣佈不加息，否則對大市影響不會太大，一於明年再戰。
趁市況悶悶地，跟進一下本欄愛股最新形勢。最大鑊要數奧思集團（1161），雖然全年盈利增長37%，但下半年表現明顯較上半年差，加上全年派息只得8.5仙，僅比去年多0.5仙（原預期踢走基金股東後會十分慷慨），雙重打擊下，結果股價直插冇水花，較最近推介水平還要低。股票最忌業績走樣，建議忍痛清倉離場。
廸生創建（113）主席潘廸生日前宣佈，將斥資10億元發展新零售科技，雖然公司出名cash多，但宣傳效益成疑，派特別息機會更因此大大減低，所以消息一出，沽盤明顯增加，始終累積升幅已多，趁股價未失足，不妨先減一減磅。
必瘦站（1830）分拆中國及澳門業務再行前一步，上市委員會已開綠燈，股價在除淨後回軟，反締造低吸良機，不妨在2元樓下試放買盤，話唔定會執到死雞！
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com