冰說聰明 - 青冰 2018年12月20日
冰說聰明：花十億不夠掟錢吸睛 - 青冰
潘迪生（左）同阿仔潘冠達星期一出來見傳媒，同時公佈集團的10億投資大計。 資料圖片 適中字型 較大字型
24歲，你在做甚麼？幣少決定走上天台掟錢畀大家，佢出身寒微，自稱炒bitcoin贏了八位數字，現在賺夠喇，想畀其他人賺嚇，其餘的事，你懂的。同一天空下，有年輕人24歲就準備接班，他是潘冠達，亦即迪生（113）創辦人潘迪生之子。
阿仔的CV一頁應該寫得曬，但夠曬份量，劍橋經濟系攞船畢業，證明係叻仔，畢業後在高盛投行部做咗一年，之後就加入迪生，以22歲之齡擔任總經理，經過兩年磨練，上周正式被委任為執董。雖然爸爸咁出名，但阿仔生活好低調，相信你在他被委任前，都起唔到佢底。
周一兩父子一齊見傳媒，同時公佈集團的10億投資大計，首先係會用2.5億翻新在太古廣場的Harvey Nichols旗艦店，翻新後會推出網購加實體的增值服務，駐英國的專業造型師，會通過即時通訊或視頻畀意見你，然後在實體店即時買到現貨，整個project由阿仔打骰。這個體驗離地得來幾創新，或是日後的購物主流，但青冰即時諗到，遠在英國的造型師，點樣可以同有米大媽溝通得來呢？
其他嗰七億幾就投資在網購平台技術及新零售科技公司，唔知公司係買股票定係玩創投，不過兩個方向都對小股東不利。迪生自2010年起已經長期揸住10億以上現金，上月業績顯示，現時凈現金有15.8億，換言之每股等值3.90元，但多年來派息唔算慷慨，尤其近幾年業務有改善，都仲係好手緊，上月的中期息，更是5年來首次，2015至2018年回購用咗6,696萬元，單係今年已經3,336萬，不過相對於15.8億現金，九牛一毛，手緊的原因𠵱家終於揭曉，原來係留十億八億畀阿仔大展拳腳。
天台掟十零皮就有四日頭條，這邊十億大計卻只有少量報道，上天真係唔公平啊！
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com