領展憑財技闖新高
2018年12月28日
美股喺拆禮物日出現報復式反彈，杜指收市反彈過千點，港股早兩日因為放假停市，避過先前美股聖誕夜大屠殺一跌。恒指昨日開市跟隨外圍上升，但投資者反應冷靜，並冇因為美股急彈就過份高興，午後A股回軟，港股有小量沽盤，令指數微跌百多點收市。
杜指過去兩個交易日大上大落
，先係急挫六百幾點，拆禮物日回升逾千點。中環茶友話，美國由高位反覆回跌四千點，單係聖誕節前就調整咗超過二千點，跌得咁急，技術上都應該出現反彈，屬於正常表現。
不排除救市小組介入美股
除咗技術性回升外，茶友話美國財長姆欽喺聖誕期間好唔得閒，要四出安排撲火救亡。總統特朗普叫人買股係出口術，關鍵係除咗得把口外，政府有無協調大戶入市。喺2008年金融海嘯期間，美國政府就組織咗「暴跌救市小組」(Plunge Protection Team)，穩定股市機制。呢次因為加息爭拗同埋政府停擺導致美股大跌，姆欽就召開救市小組電話會議，開會研究對策，雖然內容機密，但有兩個消息人士證實周一開過會。救市小組開會當然唔排除會傾點樣出手穩定市況，而且仲驚市場唔知放埋料出街。美國號稱自由經濟，但政府明白股市影響好大，而且日益重視華爾街左右經濟的力量，所以茶友唔信股市純粹由市場操作，去到危急關頭，美國政府的救市小組介入，絕不為奇。
無論有冇有形之手入市，美股喺聖誕節後首個交易日急彈，至少畀市場一個喘息機會，但無人敢講危機已經解除，因為導致跌市的不明朗因素至今未完全消除，所以投資氣氛維持審慎好正常。喺午後沽盤增加下，恒指收報25478點，跌172點；國企指數收報9991點，下滑71點，成交金額562億元。藍籌中平保(2318) 弱勢持續，早市逆流下跌，收市跌1.4%，收報69.1元，自公司高層人事變動後，股價就一直跑輸大市。中石化確認聯合石化總經理和黨委書記因工作原因停職，市場怕中石化炒油輸大錢，中石化A股暴跌6.8%，中石化H股(386) 則急跌4.7%，收報5.7元；最近屢創新高的中國鐵塔(788) 有回吐，下滑3.3%。
資金仍追捧公用股，中電(002) 升0.6%，報89.75元；煤氣(003) 升0.9%，報16.3元；港燈(2638) 升0.2%，報7.93元。同樣，被視為有穩定收益的領展(823) 逼近80元關，再創上市新高，高見79.95元，收報78.9元，微升0.1%。
拆骨賣物業谷短期股價
領展造好，與其話單靠公司收益穩定，吸引資金流入，不如話又係財技刺激。繼今年2月底完成以230億元出售17個物業予基滙資本(Gaw Capital Partners)及高盛牽頭財團交易，領展早前再次出售12項物業予基滙資本為首的財團，套現120億元。
今次出售的12項物業分佈在港九新界，交易作價較物業於9月底估值高約32%，估計物業出售淨收益為27.9億元，出售所得資金將用於在香港及內地一線城市的新投資機會，以及償還債務、基金單位回購等一般營運資金用途。
領展出售物業套現，可以令估值提高，反映資產價值。不過，呢樣嘢好多由私人大股東控制的收租公司唔會咁做，他們覺得套現再覓投資，等同貴賣貴買，何必多此一舉。
領展冇大股東，管理層將物業拆骨，一來可以令潛藏資產套現，令帳面值好睇，二來手頭資金增加可以用嚟回購，有利催谷短期股價，所以領展表現會好過其他房託同收租股。但要留意領展昨日收市報78.9元，僅升0.1元，不排除財技效應開始消化。
陸羽仁
金融High Tea 舊文
來源 source: http://hdfin.stheadline.com