金手指 - 孫柏文 2019年1月8日
金手指：國家冇錢概念股 - 孫柏文
如果話香港航空係個資本焚化爐，相信冇人反對。 資料圖片 適中字型 較大字型
上周五，股市憑李克強總理講咗十多字，暗示放水，港股就由頭升到尾。好啦，到周末時，真係出新聞，話會降準一厘，投行老吹員話等於放水萬五億。
孫柏文作為活過喺09至11年世代嘅人，一聽到「萬億放水」，真係反射式覺得人行救市騎兵殺到啦！
點知，禮拜一開市前睇啲財演行家分析，個個都話睇定啲。睇嚇係咪又係陰燭收市先再部署。網上財經節目主持人梁心欣，直情喺開市前叫眾fan屎一開市要獲利離場。
結果係點？真係開支陰燭，全日高位喺開市一刻出現。無他嘅，今時今日，我國十四億強人已深中借錢毒，萬五億都只係美沙酮，吊吊癮。淨係見放咁多水，禮拜一港股通啲北水都仲係淨流出十幾億，我哋小小香港人，當然要睇更叻嘅大灣區人方向先做嘢。
禮拜一另一焦點係香港航空，傳出話會有人注資，佢啲債由死硬，升到只係死得。如果我話香港航空係個資本焚化爐，相信冇人反對。咁當有人當錢係陰司紙時，最慘邊個？當然係啲對手啦。
所以，當國家冇錢，其實應有唔少公司受惠。香港航空唔掂，當然就會諗起國泰（293）。陰司紙策略，係喺各行各業都見，所以做嚇功課，會有唔少機會。例如，除航空業外，另一以本傷人嘅行業，就係造鋁。仲唔快啲買啲成本低嘅鋁公司，等大陸啲鋁廠sayonara？
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com