大棋局 - Mr. Tregunter 2019年1月8日
大棋局：中國武統台灣機會率 - Mr. Tregunter
不少評論指中國意圖2020年攻打台灣。圖為中國國家主席習近平。 資料圖片 適中字型 較大字型
近年不少評論指中國意圖2020年攻打台灣，2020這個時間來自習近平提出的兩個一百年，即中共建黨100年（2021），及新中國建國100年（2049），在此之前要統一台灣。台灣國防部去年的《中共軍力報告書》亦稱，中共擬於2020年前完成對台全面作戰準備。2020年還關乎兩個時間點：美國總統選舉、美國加息縮表周期完結。
攤開地圖睇一睇台灣位置，前美國國務卿杜勒斯構擬島鏈封鎖中國、蘇聯、北韓共產三寶東擴，當中最關鍵一點，就係台灣。台灣上接東海下連南海，握有兩大海域閥門。台灣一失，日本完全暴露於中國軍事壓力之下，中國東進阻力劇減。台灣的重要性，麥克阿瑟稱之為「永遠唔會沉嘅航空母艦」。
早前提及中國在南海鋪設新式量子力學的反潛裝置，以大量鋪設的方法築起水底長城，已引起美國注意。中國要拿下台灣的動機，上述為地緣戰略意義，另一重要意義，係美國封鎖中國技術轉移之際，台灣晶片技術顯得更加珍貴。所以中國唔會要一個打到稀巴爛的台灣，若打，只適合以閃電戰配合內應極速佔領。水底長城即要嚟探測並諗計拖延美軍，當製造既定現實後，內應配合話民心所向，賭美國出於務實考量放棄台灣。
有冇著數才是關鍵
留意在習近平發表《告台灣同胞書》40周年講話之前，2018年最後一日，特朗普簽署了《亞洲再保證倡議法》（ARIA）。今年同時亦係《台灣關係法》40周年，台灣一直希望美國訂立更明確的關係法。《ARIA》等同將台灣納入美國的印太戰略一環，重新承諾保障台灣安全。局勢之演變估計還會推動一件事，就係日本恢復軍隊編制。
戰爭要睇時機，而唔係睇通勝擇日，蠱惑仔會唔會話下年幾月幾日去你屋企揼你？所謂2020攻台，宣傳多於實際。中國攻台等於單挑美國，機會不高，但如果出現一種情況，例如俄羅斯染指烏克蘭之類，咁就係時機。
中式反日，係頸掛Nikon單反捕捉國人撲爛人哋部豐田房車一刻，注意係人哋部豐田；中式反美，係手執iPhone登錄微博號召國人轉用華為，注意係叫人轉用華為。並無任何諷刺意思，而係中國模式底下，國人都練就一身韋小寶功夫，好像電影《鹿鼎記》周星馳站在群情洶湧的信徒內，識趣而又懶懶閒地嗌一聲反清復明。民族大義只係講畀大中華情意結嘅人聽，攻台有冇著數先係真正考量。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com