降準有利 招行可吼
2019年01月08日
中美政府同央行見到股市喺去年尾滑坡，近日紛紛出招放水扶持。喺提振消息下，港股連續兩日反彈，昨日升幅收斂，估計係觀望由中美首度埋枱後動向。
瑞銀估滬深300見3800
中美代表再就貿易問題開會，由昨日起開兩日會，將會喺今日
結束。正路而言，首個回合多數係各自展示立場，提出要求。由於大家都要討價還價，應該唔會咁快有成果，甚至乎會講講手，硬碰幾下，實行漫天索價，等之後再落地還錢。根據中美安排，會談時間有90日去到二月底，應該仲有幾次接觸，之後若然有小小差異，可以再延期，從談判進程不必急於咁快有結論。
不過，以上只係按正常談判去評估，實際情況就要視乎特朗普態度。特朗普現在喺美墨圍牆問題上，同民主黨爭持不下，中美喺國際事務上係對手，特朗普同民主黨喺國內管治上係對手，若論肉緊可能同民主黨玩仲緊張啲，因為美墨圍牆已經令聯邦政府關門十幾日。如果特朗普急需好消息沖喜，短期可能同中國談判「有成果」，仲容易借題發揮，反正中國一直有意願達成協議。去年底副總理劉鶴同美國貿易代表開過一次會，當時都話過有共識，只不過俾特朗普馬上推翻咗。O依家攞番當時舊料包裝一下，舊瓶新酒都可以吹住話有重大進展，所以正路談判喺會場內就應該撼一撼先，但喺會場外特朗普就隨時出嚟發放好消息。
中美喺北京進行新一輪經貿磋商，瑞銀證券中國首席策略分析師高挺指出，關稅或許能夠停在現時水平，至少中美雙方態度偏向積極，關稅繼續加碼可能性較小。不過，關稅影響仍會繼續出現，負面影響可能在上半年浮現。
雖然前景有陰霾，但高挺表示，2016年1月時，內地股市市盈率係10.6倍，現在大市市盈率又回到10倍多啲。2016年當時嘅狀況，中國宏觀經濟同企業盈利都比O依家差好多。O依家估值實際上已經反映一個非常悲觀預期，今年上半年，A股企業盈利仲有5%增長，所以維持今年滬深300指數目標3800點，比昨日嘅3054點有24.4%潛在升幅。暫時睇嚟，外資對內地股市今年展望唔係咁悲觀，又或者覺得A股跌咗咁多，都應該到一個幾強嘅支持位。
內銀股陸續有進帳
喺觀望談判前夕，港股仍然造好，恒指一度重上兩萬六關，收報25835點，升209點；國企指數收報10123點，升94點，成交金額775億元。內銀股繼續有進帳，四大銀行中，建行(939) 微升0.2%，收報6.42元；工行(1398) 升0.4%，收報5.54元。其他內銀比較標青嘅係招行(3968) 收漲1.4%，收報28.65元，而且成交打入十大。
內地降準，除咗對整體景氣有利，銀行特別受惠，由於預留準備金比例減少，同一個數量嘅存款，可以借多啲出街，成本不增收入增加，直接受惠，全面降準對呢個板塊有好處，當中招行可以留意。
睇番招行現價市盈率8.6倍，派息有3.5厘。數字上睇內銀股有平過該行、派息高過該行，但招行係商業銀行，勝在長期增長比同業強，在內銀股中屬於增長類別，估值一向都有溢價。由於管理質素較高，喺逆境中防守力會較強，遇著順境更加唔會吃虧。過去一直走較大幅度的上落市，近期在27元多至34元之間走動，跌到27.4元左右就反彈，現價仍近低位，若有一浪反彈，可以上番31至34元，若上番31元，都有10%執吓。
其他股份方面，財政司司長陳茂波話合適時機可考慮放寬樓宇按揭成數，令市民容易啲上車。地產股續見追捧，長實集團(1113) 收升2.8%，報60.5元；九龍倉置業(1997) 收升2.3%，報47元；嘉里(683) 收升1.7%，報27.55元。內地航空股爬升，南方航空(1055) 收漲6.5%，報4.92元；國航(753) 收揚6%，報6.61元；東方航空(670) 收升4.2%，報4.27元。本地航空股國泰(293) 收升1.8%，報11.18元。大市彈完一輪，優質股先升，現在輪到二線同個別板塊炒接力。
陸羽仁
金融High Tea 舊文
來源 source: http://hdfin.stheadline.com