孳息掉頭 資金避險
2019年01月04日
港股新年大插，美股隔晚一度跌399點，之後指數反彈到冇乜升跌。美國總統特朗普話美股唞完氣後會回升，不過都冇人信佢，美股只是超跌反彈。
匯市閃崩 澳元急插
全球股市喺舊年12月觸發大跌市，關鍵之一係美國聯儲局不但堅持加息，
而且預示今年仲要加兩次息，有華爾街大鱷形容，局方呢個預告係機械式加息，擔心僵化操作會累死街坊，資金紛紛從股市逃離。
聯儲局喺加息同作出利息展望後俾人鬧爆，雖然局方至今未明確表示轉軚，但隨著全球前景轉暗，市場利息開始掉頭。港股新年開局大跌，誘因係內地生產數據跌穿盛衰線，市場擔心經濟放緩，之後嘅歐洲生產物價指數公佈，同樣跌至2016年以來低位。由於經濟麻麻，利息自然好難再上，加上避險情緒濃烈，所以美國國債出現價升息跌走勢，被視為最大代表性的10年期國庫債券收益率跌至2.677厘。喺其他地區前景惡化下，匯市出現閃崩，日圓更加急升，兌美元昨早一度升3.5%，另外澳元暴跌至近10年低位，曾跌穿68美仙，跌至2009年3月以來最低水平，澳元兌日圓跌幅更大，曾經跌超過7%，反映資金避險情緒高漲，部份有回流避險資產跡象，呢個現象值得留意。
本來市場最擔心係美國總統特朗普同聯儲局爭拗，令局方進退失據，現在市場因為擔心前景先行回落，正好畀咗儲局一個方向，同時為放慢甚至減息提供下台階，呢點對美股可能有支撐作用。
喺美息回軟下，恒指昨日收報25064點，跌65點；國企指數收報9835點，升1點，成交金額684億元。個別藍籌股出現急跌情況，吉利汽車(175) 一度插逾8%，收報11.92元。蘋果公司下調業績預測，股價上日大跌超過8%，令「股神」巴菲特的旗下投資旗艦巴郡投資組合帳面損失達27.7億美元(約216億港元)。本地手機股舜宇光學(2382) 則急挫6.8%，收報61.4元。瑞聲(2018) 創逾三年低位，低見40.2元，收挫5.4%，報41.05元；比亞迪電子(285) 收跌3.8%，報9.04元。
喺利息低企下，一個明顯跡象係本地地產股表現硬朗，幾隻龍頭股份不跌反升，恒地(012) 報38.7元，升0.45元；新地(016) 報112元，大升3.2元；大盤暢銷的信置(083) 收升4.4%，報13.74元。睇番地產股表現，自去年12月起好過大市，恒指昨日一度跌穿25000點，向一年低位進發，但新地距離一年低位100元仲有好大差距，恒基表現亦都相若。
本地地產股呢浸企硬，除了美息開始軟化外，周初剛公佈的覓地小組報告無料到都有關。覓地小組花咗一年時間，以千萬元計的公帑，整咗八個阿媽係女人的建議，倡議填海、發展棕地、設機制公私營合作，以至局部發展高爾夫球場。呢啲建議好多人都講過，大家都知說易行難，現在再講一次，根本等如無講。覓地小組雷聲大，結果連一滴雨都無，實際效果除咗告訴市民香港土地嚴重不足，甚至比估計更嚴重，根本一幅地都無覓到。你話發展商是否要同他們講聲多謝？
代理手瓜夠硬敢拗數
講開信和，集團喺去年尾賣觀塘大盤，反應不俗，點知賣咗千幾個單位後，忽然同兩大地產代理就佣金拗數，只願畀1.7%。從發展商角度，個盤去得咁快，皆因願意低開吸客，喺呢個環境代理賣樓都容易，都好應該「共渡時艱」。代理就認為行規唔係咁樣，公司養一大班人，燈油火蠟樣樣要錢，無理由要減佣。
有中環茶友話，這個情況公說公有理，婆說婆有理，商業社會拗數就要睇邊個手瓜硬，過去發展商倚賴代理賣樓，覺得咁樣慳番養人，又可慳番宣傳，賣到幾多樓先畀佣，長久形成發展商有十幾個，大代理實際只有兩間。從今次兩大代理公開反面，足見佢哋對自己議價能力有信心。經過今次拗佣事件，相信大地產都要諗諗點樣應對，皆因花佣事小，客源被人控制呢個至係關鍵問題。
陸羽仁
金融High Tea 舊文
來源 source: http://hdfin.stheadline.com