經濟客飯 - 曾國平 2019年3月22日
經濟客飯：大愚若智之大嶼討論 - 曾國平
要判斷明日大嶼是愚是智，要睇的不單只賣地收入，而是填出的土地總價值。 資料圖片 適中字型 較大字型
早前發展局公佈人工島造價估算約為6,240億元，至於賣地收入則預計為七千億元以上。
政府只是「預告」不是報告，沒有成本效益計算，數字有限好難分析。勉強要批評，可以質疑賣地收入太樂觀，可以質疑幾千億大額支出點樣影響政府財政穩定（十幾廿年話唔埋，早幾年先有專家話會出現結構性財赤），當然也可以根據政府往績睇死最後會嚴重超支。
不過，樓市專家姚松炎批評政府「故意漏報及低估」，話要計埋通脹去睇人工島成本，六千億成本因此會增加兩成，咁講法就未免太過大愚若智。政府估計填出來的私樓和商業用地，從而推算出賣地收入的數字，據報是以今日呎價計算，也沒有計入N年後賣地的通脹。成本計收益唔計，點算公平比較？同理，政府儲備一樣有回報，未來收入也會隨通漲調整，N年後賬面上政府會疊水過今日好多，同你六千億漲多兩成一樣。
鬧政府還鬧政府，有啲質素好唔好？要判斷明日大嶼是愚是智，要睇的不單只賣地收入（若然係咁，全數起私樓好過啦），而是填出的土地總價值、多起公屋縮短輪候時間之類。不過一講到公屋，又會出現「解決唔到150個單程證乜都唔使講」的死結，大愚若智的討論即刻變得更若智。
曾國平
美國維珍尼亞理工大學經濟系副教授
http://fb.com/economics3.0/
本欄逢周五刊出
經濟客飯 - 曾國平 舊文
來源 source: http://hk.finance.appledaily.com